Feirar 20 år i sentrum
Frå éin dag i veka, til fulltid og 15 terapeutar under same tak. Kali har opplevd ei eventyrleg vekst på 20 år i Os sentrum.
Bildeserie:
Det heile starta 19. mars 1995 i andre høgda på Oshjørnet over Tojo frisør. Med tre behandlingsrom og eitt venterom starta Laila Moberg og Karlotte Møgster Kali hud og helseterapi.
– I starten var vi der éin dag i veka kvar. Eg på tysdager og Karlotte på torsdagane.
– Vi satt no der og venta og håpa at det skulle dukke opp nokon, fortel Laila Moberg med eit smil.
Dei siste 13-14 åra har dei to hatt verksemda som fulltidsvirke, etter at dei i åra før spedde på med jobb både på sjukeheimar og på Solstrand då dei starta si spa-verksemd.
Eit internasjonalt miljø
I dag har dei to båe fulle ventelister og fått med seg 13 andre terapeuter i større eller mindre engasjement.
– Vi har blitt eit internasjonalt miljø etterkvart.
– Vi har ei frå Polen som driv med permanent makeup, ei frå Brasil med 28 års erfaring frå heimlandet som driv med kroppsbehandling og spa, ei triveleg jente frå Syria som er utdanna hudpleiar og massasjeterapeut, ein annerkjend nagl-designar frå Litauen og Karlotte frå Austevoll. I tillegg til oss andre då.
Parfymeri ved ein tilfeldigheit
I dag er dei ikkje berre eit salong for hud og helse, men òg parfymeri.
– Det at vi har blitt butikk i tillegg er eigentleg litt tilfeldig.
– Parfymeriet på Os la ned og då kom selgaren frå Clarins til oss.
– Vi ville eigentleg ikkje ta inn varer for vidare sal, men ho gav oss gode prisar og klarte å overtala oss.
– Etterkvart har den verksemda blitt utvida, og kanskje spesielt då vi flytta ned på gateplan, fortel dei to.
Ein «hemmeleg» butikk
For seks år sidan flytta dei verksemda ned frå andre etasjen på Oshjørnet til gateplan vis a vis Rimi.
– Då fekk vi høyra at vi hadde vore den meste hemmelege butikken i 14 år der vi hadde "gøymt" oss på Oshjørnet.
– Det å koma på bakkeplan gjorde godt.
– No kan vi ta vare på kundane på ein heilt anna måte enn før. Dei som ikkje er så gode til beins kan få hjelp på behandlingsrommet vi har i 1. høgda, forklarar dei driftige damene.
Turde å satsa
I lokala på i Øyro har dei no eitt behandlingsrom nede, pluss fire i andre høgda. I tillegg ein velutrusta butikk.
– Vi tykkjer vi tok ein sjanse då vi flytta bort her.
– For første gong i drifta måtte vi ta opp eit lån for å få innreia lokala.
– Mellomanna måtte vi kjerneborra tre plasser for å få vatn og avlaup på alle behandlingsromma.
– Men, det er eigentleg einaste gongen vi har satsa på den måten. Vi har i staden hatt fokus på å bygga oss opp sakte og sikkert over tid.
– Det er eigenleg litt uverkeleg at det er 20 år sidan vi starta og at det berre har økt med åra, smiler dei to.
Liv laga i sentrum
Frå starten i 1995 har dei heile tida vore i sentrum.
– For oss har det vore viktig å halda hus i sentrum. Det har aldri vore aktuelt å flytta ut.
– Det er liv laga for verksemder på Osøyro og med den utviklinga som vi ser kjem så er vi kjempeoptimistiske for framtida.
– Korleis skal morgondagen feirast?
– Då skal vi gå rundt i butikken og vera til stas og snakka med kundane.
– Her blir det ope hus med kaffi og kake, så det er berre å svinga innom, avsluttar dei to med eit smil.