Feira 50 år med open dag
Os Jakt- og Fiskelag tok imot både komande medlemmar og ferskaste æresmedlem.
Bildeserie:
– Vi fann ut at vi heller ville feira jubileet saman med ein open dag enn ein fest for medlemmar, seier Sara Behzadzadeh.
Sara er kvinnekontakt, leiar av hagleutvalet og i spissen for arrangementet i og utanfor Ulvehiet laurdag.
Frå klokka 10 til 16 kunne gjestar koma på grillmat, kaffi og kaker - og prøva ulike våpen på ulike banar.
– De yngste har skote på ballongar, ungdomane og dei vaksne har skote på blink og leirduer.
Over 500 medlemmar - og 8 æresmedlemmar
Os Jakt- og Fiskelag er blant dei største i fylket.
– Det har alltid vore aktivitet og vekst i laget. Då eg byrja her var det éin skytebane, det meste andre som er her har kome etter 1994, seier Bjørn Eitrheim om anlegget.
• Les òg: Treffsikker opning av ny bane (2017)
På årsmøtet i mars i år blei han, som første utanom dei som i 1968 var med og stifta laget, kåra til æresmedlem.
– Eg flytta til Os i 1977 og meldte meg inn i laget i 1983. Eg er ein av nykomarane, seier Bjørn etter 35 år som medlem.
Hovudinteressa er skyting, men han har supplert med fiske. Bjørn har sete i styret og i dei fleste av utvala og er æresmedlem nummer 8.
Dei andre æresmedlemmane er: Knut Kopperud, Helge Elias Flaterås, Henrik Eidsvik, Jonn Forstrønen, Sverre Bøyum, Harald Gjerde og Lars Rød.
Stilte med gåve
Jaktia (tidlegare Våpen-Søilen) var på plass med stand og demovåpen.
Hordaland Jakt- og Fiskelag stilte med stand og gåve til jubilanten; ei utstappa siland.
– Eg synest dagen har vore heilt topp, og eg synest det har vore bra med besøk trass regn og kollisjon med Osløpet, seier leiar Hogne Markhus.
Delar av jaktsesongen er i gang, tysdag er siste av dei tre årlege Jegerprøve-kursa over (neste i januar) og 1. september startar årets hjortejakt.
• Midtsiden samleside: Jakt og fiske