Fast kunde i tre generasjonar
Ekteparet Haga kjøper juletre same plass kvart år - og dei veit korleis eit skikkeleg tre skal sjå ut!
– Pappa har selt sidan vi gutane var små. Eg veit ikkje kor lenge familien har stått her, men det må vera minst 30 år, seier Jon Ole Botnevik, bonden Olav Botnevik sin mellomste son.
Han står som vanleg på Torget i Os sentrum og sel juletre dei to siste vekene før jul.
Så kjem ein kunde som vitnar om meir enn 30 års fartstid for familien Botnevik.
– Dette er tredje generasjon Botnevik vi handlar hos. Du bør berre sørgja for at det blir fleire generasjonar, seier Sølvi Haga med glimt i auget.
Ho handla tre saman med ektemannen Arnfinn Haga, og dei veit akkurat kva dei vil ha.
«Høgt, smalt og grese»
Verken plast eller edelgran står på ønskjelista til Sølvi og Arnfinn.
– Det må vera eit ekte tre, det skal lukta litt gran i huset til jul, seier Arnfinn.
– Eg liker vanleg gran best, og treet skal vera høgt, smalt og grese (glissent), vi må ha litt luft mellom greinene.
Furu og tre typar gran
Trass aukande mengde utsalsplassar og aukande inntog av juletre i plast, sel Jon Ole omtrent like mange juletre kvart år.
– Vi sel rundt 250 juletre i året. Desse er kortreiste og dermed miljøvenlege.
– På garden på Kuven har vi sjølvhogst, laurdag og søndag, og her på Osøyro sel vi tre frå Os og Lindås.
Furu, gran, edelgran og «serbergran» er i utvalet.
– Omorika, den som blir kalla serbergran, er lys frå undersida og ligg midt mellom gran og edelgran i pris.