Far og son på trygg is
Leon (6) debuterte på skøyter på Gåsakilen i dag. Han var ikkje åleine på det einaste trygge vatnet i Os.
Bildeserie:
Med minst 10 minusgradar og vind er det ei bitande kulde i Os i dag, men det første vatnet Os brannvesen har målt som farbart ligg lunt til ved bustadområdet Hjellemarka på Søfteland.
• Les òg: Fleire vatn har utrygg is
Allereie på formiddagen onsdag var det sju unge og vaksne i fri leik på eit brøytt område av Gåsakilen.
– Eg bur på Søfteland, men det er mange år sidan eg har gått på skøyter, og då var det på Vinddalsvatnet. Her har eg aldri vore før, seier Thomas Valle.
Han hadde med seg sonen Leon (6), som dermed fekk sin debut på skøyter denne vinterferien.
Med og utan skøyter
Mens Thomas hadde med seg både hockeykølle og puck, stilte andre foreldre utan skøyter.
– Vi bur i området og ville ned og testa isen, det er tydelegvis kjekt å leika her med sko òg. Men vi skal sjå om vi får tak i skøyter i ettermiddag, seier Charlotte Lysvold.
Ho og borna Noah (4) og Milla (7) hadde med seg akebrett og spade.
Ei som verkeleg hadde fått fart på skøytene var Malene (10). Ho var på isen med mamma Linde Merete Trengereid, som blei vitne til høg fart, brå svingar og eitt og anna fall.
– Ikkje heile vatnet er trygt
Då Os brannvesen i går målte isen på Gåsakilen oppdaga dei forskjell fleire stadar.
– I nordenden er isen utrygg, det same gjeld langs land der det er bratt terreng ned mot vatnet, seier Gitle Smaadal frå Os brannvesen.
Grensene til dei utrygge områda er markerte med buskar.
• Les òg: Isvettreglane