Får ein halv million

Fredag 14. juni skal stortinget handsama revidert nasjonalbudsjett. Då får Kongshaug musikkgymnas svar på om dei får tilbake meir av det særskilte tilskotet som regjeringa kutta i då dei presenterte statsbudsjettet for 2013.

Les òg: – Dette er dramatisk

Kuttet var på heile 3,6 millionar kroner, men noko av kuttet blei reversert slik at skulen var sikra drifta fram til sommarferien.

Fylkestinget gir 500.000

På fylkestinget i Lofthus tysdag fremma Terje Søviknes (Frp) forslag om at Hordaland Fylkeskommune skulle gje 500.000 kroner som ei sikring for Kongshaug om det ikkje kjem midlar i revidert nasjonalsbudsjett.

– Framlegget blei vedtatt med røystene frå Frp, H, Krf, V og Miljøpartiet dei grøne.

– Signala for hausten har vore negative frå den raudgrøne regjeringa. Eg fremja difor forslaget som ei krisehjelp til Kongshaug, så får om vi kan retta opp i det med ei ny regjering etter valet, fortel Søviknes.

– Eit viktig signal

Rektor Oddvar Rotvik er glad for støtta frå fylkespolitikarane.

– Det er fantastisk at fylkestinget viser vilje til å støtta oss og samstundes signalisera at Kongshaug har kome for å bli.

– Men vi er heilt avhengige av ein annan forutsigbarheit enn den vi har no. Difor håpar vi framleis på revidert nasjonalbudsjett, sier Rotvik.

Godkjenner skulen, men vil ikkje betala

Om ikkje Kongshaug når opp i revisjonen av statsbudsjettet tyder det at dei mistar 1,6 millionar kroner i statstilskot for 2013.

– Vi risikerar å miste 3 millionar til neste år. Det klarar vi ikkje erstatta med milde gåver frå fylkeskommunen og andre.

– Vi er avhengige av sikre tilskot frå staten.

– Dei kan ikkje godkjenne utviding, og at vi er eit gymnas med spesialkompetanse innan musikk, og samstundes ikkje gje oss levlege vilkår, kommenterar Rotvik på veg inn til å høyra ein ny elev gjennomføra eksamen på hovudinstrumentet sitt.