– Fantastiske turar
Paintball, juv-vandring, klatring, RIB over Bjørnafjorden. Ungdommar på MOT-tur fekk prøvd seg.
Bildeserie:
Første veka etter skuleslutt kvart år arrangerer MOT turar for ungdom i kommunen.
- Vi har dei siste åra hatt ein tur til Øygarden for ungdommar på ungdomsskulen med overnatting og eit par dagsturar til Vinnes, fortel MOT-koordinator Ellen Merete Lyssand.
På turane har ungdommane fått testa ting dei truleg aldri har freista før.
To netter i lavvo
Ungdomsskuleelevane reiste, nær sagt tradisjonen tru, til Klyva i Øygarden med overnatting og aktiviteter.
- Dei driv ein camp for teambuilding og skuleklasser.
- Der budde vi i lavvo og fekk prøve både juv-vandring, paintball, øksekast og Zip-line.
- Eg trur det var mange som fekk teste grensane sine, men det var ein fantastisk gjeng å reise på tur saman med, fortel Lyssand om dei 15 elevane ho hadde med seg.
Klatra frå båt
For sjuende klassingane arrangerte MOT to dagsturar til Vinnes i regi av Vidar Øvredal.
- Vidar hadde eit kjempeopplegg som vi heilt sikkert kjem til å nytta oss meir utav.
- Han henta oss i ein RIB på Os før vi suste over Bjørnefjorden til Vinnesholmen kor kajakkar og meir til låg klare.
- Etter ein kort instruksjon frå Vidar var det berre å koma seg utpå fjorden og testa nyerverva kunnskap, smiler Lyssand.
Høgdepunkt på turen var truleg då han tok med seg ungdommane bort til ein loddrett vegg ned i fjorden kor ungdommane fekk klatra medan Vidar sto i båten og sikra dei.
Les òg: Action i Øygarden (frå MOT-turen i fjor)
- Det var utruleg tøft.
- Ein og ein fekk ungdommane på seg sele og klatra oppover veggen medan dei andre låg rundt i kajakkane og venta på tur, avsluttar Lyssand med eit stort smil.