Falske skilt og tjuveri
Politiet: Bil med heimelaga skilt på Søfteland. Tjuvlånt bil på Halhjem og høg musikk ved Amfi.
Måndag førmiddag kom politiet over ein parkert bil på Søfteland som ikkje var heilt i henhald til reglane.
– Den hadde eigenproduserte kjenneteikn.
– Om bilen faktisk var avregistrert eller om eigaren hadde dei ekte kjenneteikna heim kjem ikkje fram frå loggen, men uansett vil det bli oppretta sak for dokumentfalsk, fortel vakthavande betjent ved Os Lensmannskontor.
Tysdag morgon fekk politiet melding om eit mogleg motorvogntjuveri på Halhjem.
– Det er noko uvisse kring saka. Bileigar meiner å vite kven som har tatt bilen og kor den er no, så vi kjem til å følgje dette opp.
Politiet har òg fått ettermeld ein slåstkamp i helga.
– To menn i 20-åra hadde braka saman. Vi møtte fornærma på legevakta tidlegare i veka.
– I går blei den mistenkte avhøyrd og ein slåsthanske beslaglagt, fortel betjenten.
Det har òg kome melding om ein påkøyrd katt ved Best-stasjonen på Byvegen måndag kveld og uvedkommande som hadde tatt seg inn i returlageret ved Amfi Os i morgontimane.
– Vi fekk òg klage på høg musikk frå eit husvære ved Amfi i 0500-tida i morges, avslutter vakthavande betjent ved lensmannskontoret.