Fallulykke på Skorpo
Mann (25) lettare skadd etter fall: Luftambulanse og redningsdykkarar rykte tysdag ettermiddag ut på bergingsoppdrag på Skorpo.
Tysdag klokka 15.35 kom melding om fallulykke på Skorpo.
Meldinga gjekk først ut på at ein person skal ha ramla frå ei høgd på rundt 10 meter og uti sjøen.
– Luftambulanse, ambulansebåten Ryger Vakt og redningsdykkarar er på veg til staden, sa Erik Walden frå Os brannvesen i 15.40-tida.
Ulykka skjedde nord på øya Skorpo. Brannvesenet kjenner ikkje til høgda vedkomande skal ha ramla frå.
OPPDATERT: Den skadde er ein 25 år gamal mann. Han slapp ifølgje Helse Bergen frå fallet med lettare skadar.
Brannvesenet rykte ut klokka 15.37, var på Strøno kai klokka 15.47 og fekk seinare sendt ut båt med redningsdykkarar.
– Dykkarane var aldri i vatnet, vedkomande hadde blitt tatt hand om av helsepersonell som var først på staden.
Den skadde blei transportert til Krokeide med ambulansebåt og vidare til Haukeland universitetssjukehus med luftambulanse.
Kva som er årsaka er førebels uvisst.