Fabelaktig fotball-fredag
Trass snøslaps og sure tilhøve på Kuventræ fredag storkoste vel 50 ivrige fotballspelarar seg. Halvparten av dei jenter.
Bildeserie:
«Fabelaktig fredag», eit ekstratilbod for Os Fotball til fotballspelarar frå 2. til 7. klasse, som har fri frå skulen, blei ein suksess.
– Det har gått veldig bra, trass vêret. Her handlar det om å vera i bevegelse og ha det gøy.
– Vi har spelarar frå alle klubbane i bygda, fortel "rektor" Endre Brenne og ramsar opp Søre Neset, Nore Neset, Lysekloster, Jadakameratene og Søfteland i tillegg til moderklubben Os.
Servitøren Hassan
Rundt han svinsar a-lagstrenar Hassan ElFakiri, denne gong som servitør for sultne fotballspelarar i ferd med å få varmen i kroppen ved hjelp av tomatsuppe med makaroni og brød etter ei første økt ute i kulda.
– Det er berre dei eldste som har vore uten no. Dei yngste har vore inne i hallen og gjennomført «Mesternes meister», fordelt på seks poster kor dei mellomanna har fått testa styrke, balanse, hurtigheit og presisjon.
– Dottera til Hassan, som er av dei aller yngste, viste at ho har gode gener. Ho knuste alle på styrkeposten, skryt Brenne.
– Går gutane ein høg gang
Brenne gler seg over den store deltakinga, ikkje minst at det er så mange jenter med.
– Vi hadde seksti påmelde, men fem av dei har blitt sjuke, så vi er 55 med her i dag.
– Det som er ekstra gledeleg er at omlag halvparten av dei er jenter, og dei går gutta ein høg gang.
– I tillegg må eg få skryta av dei to damene vi har på kjøkkenet som vartar opp med tomatsuppe og mat til oss. Dei gjer ein uvurderleg innsats.
– Ute på banen og på dei forskjellige postane har vi med oss spelarar frå gutte- og juniorlaget. Dei gjer ein kjempeinnsats for klubben og som forbilde for dei yngre spelarane, avsluttar Brenne, før han forsvinn ut til spelarane for å køyre spørrekonkurranse med kinderegg-premie.