Etterlyser grøn Caravelle
Politiet i Os etterlyser ein bil med to vaksne og to unge jenter. Dei reknar med at bilen er på veg nordover i Noreg.
I samband med etterforsking av ei sak ønskjer politiet tips om ein grøn volkswagen caravelle med kjennemerke BP22934.
Politiet reknar med at bilen kan vera å sjå i Sogn og Fjordane, Møre og Romsdal, Oppland eller Sør-Trøndelag.
– Vi gjekk ut med etterlysinga i avisene nordover i går kveld. Bilen kan ha flytta seg langt på desse 10 timane, seier lensmann Oddbjørn Dyrdal.
Bilen blir brukt av ein mann og ei kvinne som har med seg to unge jenter.
– Viss nokon ser bilen; ta umiddelbart kontakt med lokalt politi. Det er ikkje ønkeleg at publikum føretek seg noko utover dette, står det i pressemeldinga.
Lensmann Dyrdal vil ikkje seia noko om kvifor dei etterlyser opplysningar om kvar bilen er.
Politiet når du på 02800. Os lensmannskontor har nummer 56 30 39 00.