Erna om skule, helse - og veg
Unge og gamle sat benka på senteret utover på ettermiddagen for å møta høgreleiar Erna Solberg.
Bildeserie:
Laurdag ettermiddag var Erna Solberg innom Høgre sin stand på Amfisenteret. Fleire parti var representert på senteret denne dagen, men Arbeiderpartiet, KrF og MdG hadde pakka saman før Solberg i 16.15-tida kom inn dørene på senteret.
Etter å ha helst på dei lokale Frp-politikarane og stortingsrepresentant Laila Reiertsen på veg til Høgre sin stand var det tid for ein liten appell.
Solberg snakka om helsekøar, arbeidsplassar, kunnskap og skule før det var ope for fotorunde, autografskriving og ein prat med media.
– Korleis har det vore å ha favorittstempel til statsminister-jobben på seg over så lang tid?
– Vi valte tidleg ein strategi om å halda oss til å snakka om vår eigen politikk, og det trur eg vi har skåra på. Men sidan motstandarane våre også berre vil snakka om vår politikk har det vore utfordrande.
– Du blir angripen, men vi har halde oss høgt på målingane, så det har vore kjekt.
– Om Høgre saman med nokre eller alle dei andre borgarlege hadde klart å samla seg før valkampen, med eit tydeleg regjeringsalternativ, trur du de hadde stått sendå sterkare?
– Ja, om vi hadde klart det, at alle sa ja, så ville vi kanskje det. Men no får veljarane avgera styrkeforholdet mellom oss på borgarleg side, og så er det stemmene som avgjer korleis ei borgarleg regjering ser ut etter valet.
– Det har vore stilt spørsmål til E39 Svegatjørn-Rådal, om utsetjing grunna krav om deponi i reguleringsplanen og om bompengediskusjon kan skapa forseinkingar ved eventuelt blått fleirtal. Kan Svegatjørn-Rådal bli utsett om du blir statsminister?
– Slett ikkje. Dette er panisk svartmaling frå dei raugrøne si side. Det er nettopp rask realisering av fleire vegstrekk vi har plan om.
– Høgre vil også vera rask med ferjefri veg og går for midtre trasé med bru over Bjørnafjorden. Trur du dei borgarlege taper stemmer på dette i Os, ei bygd der folk frå fleire politiske krinsar er skeptiske til midtre trasé?
– Sjølv om alt ikkje er klart, blant anna med ilandføring og løysingar, er dette ein svært viktig veg for næringsliv og andre reisande.
– Vi kan ikkje ta omvegar på 10 og 20 minutt i kvar bygd oppover kysten om vi vil laga ein god kyststamveg på Vestlandet.
Erna har tidlegare i dag vore på Sartor Senter, på Torgallmenningen i Bergen og på Lagunen Storsenter. I kveld skal ho pakka kofferten sin for å reisa til Oslo, der ho i morgon skal opna Kom deg ut-dagen.