Walden og Storum inn i leiargruppa
Espen Storum og Erik Walden blir del av leiinga i Os brann og redning.
Bildeserie:
Espen Storum (32) frå Os brannvesen overtar etter Anne Kjersti Storebø som leiar for forebygging.
Erik Walden (49), ein av dei tolv søkjarane til stillinga som brannsjef i Bjørnafjorden kommune, har fått stillinga som leiar for beredskap med tilhøyrande tittel som varabrannsjef.
• Les òg: Eivind Hovden blir ny brannsjef i Os
23 år som brannmann i Bergen
Walden er fødd og oppvaksen på Strøno og bur i Nordmarka i Os. Han har to vaksne søner. Etter FN-teneste i Libanon i 1992-1993 byrja han i 1996 som fulltidstilsett ved Bergen brannvesen. Der har han gått gradane frå aspirant til konstabel 1, og er no underbrannmeister og utrykkingsleiar.
Over fem år på deltid har han tatt bachelorgrad innan leiarutdanning med krisehandtering som fordjupning.
Walden har òg engasjert seg i Norske Redningshunder. I 2015 var han i utanlandsteneste for Norsar i jordskjelvramma Nepal, i 2017 var han på TV2 som deltakar i overlevelses-serien «Øya».
Rekruttert av Monsen
Ved sidan av fast jobb i Bergen brannvesen har han vore deltidstilsett ved Os brann- og redning i rundt 20 år.
– Det var faktisk Arne som oppmoda meg å søkja på deltidsstillinga, som tillegg til den i Bergen, då han var på tilsyn i bustaden min, fortel Erik.
No er han glad og audmjuk for å ha fått jobben.
– Arne er ein nestor i Os brannvesen. Eg skal gjera mitt beste å fylla rolla han snart trer ut av.
– Eg kjenner Erik som ein fagleg dyktig mann. Eg håper han trivst i stillinga og ønskjer han lykke til, seier Arne Monsen.
Monsen, som i juni blei hylla for 50 år i teneste, har si siste vakt i september.
I skrivande stund er Walden på vakt for Monsen, som er på ferie. Kor tid Walden tiltrer i stillinga er ikkje bestemt.
– Eg har tre månadar oppseiingstid, men eg seier meg ikkje opp i Bergen, eg søkjer permisjon. No kjem det an på kor tid dei let meg gå.
– Eg gler meg uansett til å byrja i fulltidsjobb i heimbygda. Det er ein god stasjon med stort potensiale og godt mannskap, og vi får ei spennande framtid som ny og større kommune.