Erfaren hudpleiar frå Brasil opnar eige senter i Os
– Eg har investert i noko av det beste teknologiske utstyret eg brukte då eg jobba i Portugal, seier Valdirene Ghiotti, som opnar i Brugata i neste veke.
Bildeserie:
Valdirene har foreldre frå Portugal og Italia, derav ettenamnet Ghiotti, men er fødd og oppvaksen i São Paulo. Ho har jobba med hudpleie i 25 år, både i Brasil og i Portugal, der mannen hennar er frå.
Hermenegildo Dias måtte skifta bransje frå finans og bank til buss etter førre finanskrise.
– Eg køyrde på nokre hyggelege passasjerar frå Os, Jan Harald Revheim og Arne Bogevik, som inviterte meg til Os for å køyra buss. Vegane er ganske like her som på Madeira, seier Hermenegildo og ler.
Han reiste frå Portugal for tre år sidan, for å jobba for Osbuss nokre månadar. Månadar blei til år og han er framleis på lønningslista til Bogevik.
Også kona, Valdirene, som kom til Os for eit år sidan, fekk jobb, og har drive med faget sitt sidan ho kom til Noreg. No tar ho steget vidare og opnar eige senter, Secrets Hud & Helseterapi AS.
– Eg ventar på det siste utstyret og er klar for opning måndag, seier Valdirene, som har fått lokale på gateplan, på baksida av DNB, ved sidan av Engeline ut mot Oselvo.
Investerer i høgteknologi
Ghiotti har erfaring innan alt frå hudpleie og fotpleie til massasje, manikyr, hårfjerning, kunstige augevipper og forming av augebryn (threading).
– Eg har inntrykk av at metodar og utstyr har stoppa litt opp i Noreg. Høgteknologisk utstyr blir brukt i stor skala ute i Europa, på spasenter og hudklinikkar, er utstyr eg har sakna mens eg har jobba her.
Alt frå ozonterapi til fjerning av neglesopp med laser står på programmet, det gjer også fjerning av strekkmerke, pigmentflekkar og antiage-behandling.
– Det har i periodar vore frustrerane å ikkje kunna hjelpa kundane godt nok, anten det er snakk om hudpleie eller fjerning av liktorn, ting som kunne vore gjort mykje meir effektivt om eg hadde verktøyet eg brukte i Brasil, Portugal og då eg jobba i London.
Utan å ha bank i ryggen har ho og mannen satsa rundt ein halv million kroner på dei første apparata. Fleire står på ønskjelista.
– Vi har kjøpt toppmodellar av nokre av dei mest anerkjente merka, maskiner produsert i Spania, kjøpt via skandinavisk importør. Handklevarmar med UV-stråler er òg på plass, å vaska på 90 gradar er ikkje nok, å ha det reinsleg er essensielt i denne bransjen.
Vil ikkje sjå på klokka
Secrets Hud & Helseterapi har ein brei meny frå start, frå fotpleie og manikyr til hudpleie og hårfjerning.
– Eg er perfeksjonist og opptatt av at kundane skal få som venta. Derfor tel eg ikkje timar eller minutt, eg lager ein meny med ulike behandlingar så tar det den tida det tar.
– Det er resultatet som er viktigast, eg liker ikkje senda kundane ut døra med beskjed om at vi skal gjera oss ferdige ein annan dag.
Lyst «sommarhår» kan erstatta hårfjerning
Secrets blir også noko «secret», litt intim.
Brasiliansk voks er i utvalet, ifølgje Valdirene kan du «få kva frisyre og farge du vil».
– Ei anna hårbehandling, som er veldig populært blant dei mest forfengelege i Brasil, er «secret moon bath». Dette er for dei som ikkje ønskjer å fjerna hår, men vil ha eit meir sensuelt preg. Her får du bleikt, mjukt «sommarhår» på kroppen og slepp å følgja opp med barbering eller anna hårfjerning.
Resepsjon og to behandlingsrom står klare, no gjenstår berre siste utstyr inn dørene og litt finpuss på lokalet.
– Eg ser veldig fram til å koma i gang. Vi har planlagt dette sidan juni og eg er glad vi har fått lokale og utstyr til å starta. Men eg er òg veldig spent, seier Valdirene Ghiotti.