Er-An Veikro prega Osbygda 4. juli

Bildeserie:

Full skjerm

1 av 36

Er-An Veikro og Os Amcarklubb prega tradisjon tru, for sjette året på rad, store delar av Osbygda og E39 mellom Røykenes og Halhjem 4. juli.

Sjå bildeserie og video frå parade og børning i 2014, 2015 (Lothepus-konsert), 2016 (Knut er best på børning), 2017 og 2018.

Det var i utgangspunktet meldt regn, men meldingane endra seg og kortesjen kunne gli av garde under sol og blå himmel.

– Fantastisk kjekt at vi var så heldig, seier vegkrosjef Linda F. Andersen og tar på seg USA-jakken før ho sette seg bak rattet i sin eigen cabriolet.

Mange stilte med lekre glis av ulik årgang, andre hadde pynta seg sjølv meir enn bilen.

– Litt effektar høyrer med, seier Trine Hjertholm, og viser smykke, klokke og skjerf - i tillegg til øyredobbane, solbrillene og hovudpynten - alt i fargane til det amerikanske flagget.

Truls Marceliussen rakk ikkje lakkera bilen han stilte med, men viste stolt fram lakkskoa. Tore Færevaag og sonen Jens (7) sto i tet med ein Chevrolet SSR 2004. Gartnaren kjøpte den grøne bilen for halvanna år sidan, og sonen synest den er dagens nest tøffaste.

– Den tøffaste bilen er den lange svarte med ølkassar på taket, synest 7-åringen.

Klokka 19.10, for å få best mogleg klaff med ferjer frå Halhjem og Hatvik, blei E39 blokkert for å sleppa dei mange deltakarane frå blant anna Os og Bergen i samla flokk ut på vegen. Så glei paraden til Halhjem og tilbake, via Os sentrum. Fleire stadar sto det folk klare til å sjå årets kortesje.