– Er lut lei den elendige vegstandarden
At Hegglandsdalsvegen får 2,3 km med ny asfalt, imponerer ikkje Agnar Midtsæter.
– Nesten heile Hegglandsdalsvegen har dårleg dekke, men det er verst i Rødsliane, særleg nedste del, seier Agnar Midtsæter.
Han bur i Bogstrandvegen og bruker fylkesveg 579 dagleg.
– Her har det vore elendig i fleire månadar, og det er dessverre ikkje teikn til betring. Det hender av og til at det kjem ein bil med ein mann med spade og bøtte, det er nesten komisk å sjå.
Midtsæter meiner vegstandarden går utover både bilar og mjuke trafikantar.
– Bilane humpar og ristar, og dei som syklar her inne har sikkert behov for nyrebelte, i tillegg til at risikoen for punktering og sykkelvelt aukar slik standarden er no.
I mars fortalde fortel Vestland fylkeskommune at 60 strekningar av fylkesveg skal få nytt asfaltdekke i 2023.
Berre eitt vegstrekk med fylkesveg i Bjørnafjorden kommune skulle få ny asfalt: 1.610 meter av Venjaneset.
I juli kunne ordførar Trine Lindborg fortelja til Os & Fusaposten at fylkeskommunen hadde funne rom for noko meir.
I tillegg skal to stykke på 1.850 og 1.500 meter av Holmefjordvegen og 2.336 meter av Hegglandsdalsvegen få nytt dekke.
– Det held ikkje med 2,3 kilometer. Hegglandsdalsvegen er 13 kilometer lang, og heile bør takast, meiner Midtsæter.
– Den finaste vegen her inne er den kommunale vegen inn til Øvredalen. Men den har langt frå same trafikk, legg han til.
