Er du dårleg «til beins»?
Aleksander Lindkvist har opna naprapatklinikk på Kuventræ.
Bildeserie:
Tidlegare Os-spelar Aleksander Lindkvist gjer comeback på Kuventræ, ikkje berre som spelar, men med nyopna klinikk med avtale om oppfølging av spelarar både i Os Fotball og Lysekloster IL.
I tillegg til fotballspelarar tar han allereie imot «sivile» osingar og tilreisande med vonde skuldre, stive nakkar og slarkete hofter.
Til Stockholm via Sogndal
Lindkvist var del av juniorlaget til Os som rykte opp til eliteserien og gjorde reint bord i dei fleste cupar i 2007 og 2008. Men då han blei tatt opp i A-stallen måtte han kasta inn handkledet grunna skader i anklar og kne.
Det var via eigne skader og seinare spel for Årdal, mens han studerte idrett ved i Høgskulen i Sogn og Fjordane, at han blei kjent med naprapati.
– Ein av lærarane mine var naprapat og engasjert innan forebygging og behandling av spelarar på Sogndal. Eg fekk hjelp av han og fekk lyst å gå same veg sjølv, fortel Aleksander.
Den svenske hovudstaden var nærmaste plass å ta utdanninga, og etter 3,5 år i Stockholm tok Lindkvist for knappe to veker sidan siste eksamen med 27 av 27 oppgåver rett gjennomført.
– Når du har bestått alt så er det godkjent at du opnar eigen praksis. Hovudoppgåva står igjen, den jobbar eg med saman med ein tidlegare klassekamerat frå Sandefjord, for levering i mai.
Praksis frå første stund
Valet for idrettsstudenten sto mellom manuellterapi og naprapati, to behandlingsformer Lindkvist meiner liknar mykje.
– For å bli manuellterapeut treng du tre år utdanning for å bli fysioterapeut og eitt år i lære, der du kan bli plassert nærmast kor som helst, før du tar to år med vidareutdanning innan manuellterapi.
– Eg synest seks år er lenge og valte naprapati, der du i staden bruker fire år og startar rett på faget som eg synest er mest interessant.
– På skulen i Stockholm fekk vi dessutan veldig tidlig kontakt og opplæring med pasientar, og praksis via studentklinikken, ein stad pasientane kunne koma og få billigare behandling enn andre klinikkar.
Kurs og forebygging
Naprapatar gjev behandling til pasientar med muskel- eller leddplager og er mykje brukt av idrettslag og bedrifter. Men i motsetnad til manuellterapeutar kan dei ikkje visa vidare til MR eller operasjon.
– I Sverige og Finland har naprapatar vore autoriserte sidan 1994. Eg håper forbundet snart får gjennomslag for liknande autorisasjon også i Noreg.
I heimlandet må Lindkvist og andre naprapatar førebels nøya seg med å ha status som alternativ behandling.
– Eg trur likevel det blir nok å gjera på. No blir det to dagar i veka på ein klinikk i Fana og tre dagar på den nyetablerte klinikken min på Kuventræ.
Eit kontor i naborommet på klubbhuset tar Lindkvist i dag imot både fotballspelarar og andre. For Os Fotball held han dessutan teoretisk og praktisk kurs for spelarar og trenarar innan skadeforebygging.
I samarbeid med personleg trenar
Klinikken på Kuventræ har han kalla Napracoach, eit namn han forsvarer saman med tidlegare lagkamerat Martin Eidsvik.
Eidsvik er utdanna personleg trenar og dei to kan koma til å senda fleire kundar seg imellom.
– Martin jobbar på Sprek og Blid og kan koma i kontakt med folk som treng meir enn berre trening for å bli bra, og eg kjem nok til å ha pasientar som blir smertefri, men som kan ha nytte av Martin sine kunnskapar for å trena seg opp igjen, seier Aleksander Lindkvist.
Om naprapati
Naprapatene gir helsefremmende og effektiv manuellbehandling av muskel- og leddplager. Napraptien ble grunnlagt på starten av 1900-tallet av Dr. Oakley Smith (1880-1967).
Smith var utdannet kiropraktor. I 1970 startet den første naprapaten i Sverige, Bjørn Jönson Berg, Naprapathögskolan i Stockholm. Han hadde sin bakgrunn fra sine naprapatstudier i Chicago hvor en av hans lærere var selveste Oakley Smith. Norges naprapatforbund ble etablert i 1993. Året etter, i 1994, fikk naprapatene autorisasjon i Sverige og Finland.
I dag er det over 400 yrkesaktive naprapter i Norge fordelt på omtrent 300 etablerte klinikker utover vårt langstrakte land. En av Norges naprapatforbund sine viktigste oppgaver i dag er å jobbe for autorisajon av naprapater.
Kilde: naprapat.org