Er 35 meter nok?

Fredag kveld og natt til laurdag fekk hamna utanfor Os Sjøfront litt å prøva seg på. Kraftig vind og høge bølgjer frå uheldig retning gjorde at fleire båtar fekk skader og måtte flyttast. Os brannvesen var på på redningsarbeidet.

Les òg: Dagen derpå i Hatvik og Fleire båtar knust i vinden

– Vi har ikkje blitt kontakta av nokre av båteigarane i etterkant. Dette blir uansett ei sak mellom dei og forsikringsselskapet, seier Rita Paulsen i StorBergen Boligbyggelag.

– Vi sendte tidlegare i haust ut informasjon til båteigarane om at restane av bølgjebrytaren blei fjerna og at båteigarar som vel å ha båten i hamna gjennom vinteren gjer dette på eige ansvar og risiko.

Forlenger moloen

Den 120 meter lange bølgjebrytaren som tidlegare forlenga moloen heldt ikkje mål og i haust bestemte Os Sjøfront seg for ikkje å erstatta den med ein ny, men heller å utvida den nye moloen utanfor bustadane og Oseana.

Les òg: No skal hamna sikrast

– Arbeidet starta for rundt ein månad sidan, det har allereie kome fleire lass med stein på botnen, seier Karianne Strømme frå StorBergen.

Vassbakk og Stol har oppdraget. Strømme reknar med at arbeidet er ferdig i april.

Blir den lang nok?

Men moloen blir ikkje forlenga med 120 meter, den skal berre bli 35 meter lengre enn den er i dag (205 meter).

"Det er så lite at dei kan like godt la det vera" meiner enkelte båtfolk Midtsiden har snakka med.

– Viss vi skulle ha sikra brygga langs heile promenaden, sånn vi først hadde håp om at bølgjebrytaren skulle gjera, så måtte moloen vore lengre.

– Men det har vi slått frå oss, vi kjem førebels ikkje til å bygga og selja båtplassar så langt inne i hamna.

– No konsentrer vi oss om å sikra den hamna vi har, og då skal 35 meter vera godt nok.

Geologar frå Multiconsult har rekna ut korleis moloen kan forlengast, både for å sikra dagens hamn og ved eventuell utviding.

– No bygger vi på ein rygg, skal moloen bli endå lengre blir det djupare og dyrare, seier Strømme.

Os Sjøfront bruker 4-5 millionar kroner på desse 35 meterane.