Enorm elevauke på gang

I tenesteutvalet onsdag presenterte skulefagleg rådgjevar Knut Vidar Garlid tal på elevar i grunnskulen i Os.

Elevtalet har auka jamnt og trutt frå skuleåret 2012/13 kor det gjekk 2473 elevar i grunnskulen til skuleåret 2016/17 med 2794 elevar.

– Elevtal er kanskje eitt av dei mest spennande områda i Os. Til neste år passerer vi for første gang 2900 elevar i grunnskulen i Os. Det er eit svært kull fødd i 2012 som skal inn. Til no har vi fylt klasseromma, så må vi sjå korleis vi skal løyse det frå neste år, kommenterte Garlid.

Kva med lærartettleiken?

Samstundes som elevtalet har auka kraftig har ikkje talet på lærarar auka tilsvarande. I 2012/13 var det 207,6 årsverk for undervisningspersonale, i skuleåret 2016/17 var talet 209,4.

– Det med lærertettleik er eit problem. Når vi fyller klassene våre, så vil den gå ned. Vi har nokre prosjekter på gang, spesielt i høve oppfølging av dei yngste elevene våre.

Det er spesiell merksemd på korleis skulane organiserer undervisning og ressursbruk inn mot småskuletrinnet (1.-4.trinn). Tidleg innsats gjennom auka lærartettleik, ressurslærar og tilpassa opplæring er sentrale tema i møter med skuleleiingane. Forskningsprosjektet «Two teachers», som Os kommune er med i, er eit forskningsprosjekt som skal undersøke effekten av auka lærartettleik for norske elevar. Kva dette har å bety for elevane si læring og læringsmiljø.

For lite fokus

Siren Tømmerbakke (SP) hadde ønskja seg meir tydelege signal frå administrasjonen.

– For oss som er politikarar og skal inn i budsjettprosess, så skulle eg ha ønskt at de var klarare på dette med lærartettleik. Er den for låg eller? Eg skulle ønskt de hadde kome med eit tydlegare råd til oss, kommenterte Tømmerbakke.

– Det har vore heilt bevisst frå vår side at vi ikkje har gått inn på å snakke konkret om kva som bør vera av lærartettleik. Det er stor grad av usemje om kva lærartettleik har å bety for resultata. Two teachers-prosjektet skal forhåpentlegvis avdekke noko av dette, svara kommunalsjef Line Rye.

– Ja, men om vi skal gjera noko med det i budsjettprosessen, så må vi få nokre signal på at skulen treng fleire lærarar om det er det ein meiner. Elevtalet aukar, lærartettleiken gjer det ikkje tilsvarande, konstanterte Tømmerbakke.

Vil kosta mykje

Eirik André Hesthamar (Frp) var ikkje samd med Tømmerbakke.

– Dette er ein tilstandsrapport. Det er ikkje naturleg at den skal peike på forslag til budsjettet. Det er det tertialrapportane og budsjettkonferansen som skal gjera.

– For å seie som tidlegare kommunalsjef Nils Petter Borge, Vi bruker krona på begge sider og av og til må vi bruke den på kantane også. Det er ingen enkel situasjon å finna penger til å auke lærartettleiken. Då vi starta prosjekt Betre Læringsresultat, så gjorde vi ei berekning kva det ville kosta å ha ein lærar per tolv elev. Det ville gje 30 millionar i auka driftskostander, påpeika Hesthamar.