– Endeleg!

Bjarte Andersen innrømmar det har vore ein stri sommar, men gler seg stor over endeleg å kunne ønskje osingar og andre velkommen til nyopning av nattklubben i sentrum.

– Morgondagen blir garantert årets beste fredag.

– Eg kan lova deg at det blir happy friday med ei stemning som kjem til å overgå det meste, strålar Andersen medan han tek Midtsiden med på ein rundtur i dei nyoppussa lokala.

Totalrenovert

Fargane på veggen er skifta, dansegolvet har blitt større, ein ny flaskebar er på plass i biljardrommet, dei to barane mellom salongen og dansegulvet har blitt slått saman og opna opp.

– Midt oppe i alle krav og ting som måtte ordnast, har vi nytta høve til å fornya oss.

Saman med Thomas Hodne og dei tilsette har Andersen stått på sein og tidleg med fornyinga.

– Thomas og dei tilsette har gjort ein utruleg jobb, og har betydd mykje oppe i det heile.

– Eg synest ærleg talt at det har blitt kjempebra, no håpar eg osingane tykkjer det same.

Nytt namn

Den største skilnaden folk flest vil merka i det daglege er den nye fasaden, med det nye namnet: Catten – minst ni liv.

– Vi tek med oss katten vidare, men klarar ikkje la vera å også ta med oss den tida vi har vore gjennom.

– Difor har vi slengt på sloganet “minst ni liv”. Det er eit lite uttrykk for tida vi no legg bak oss.

– Det har vore tøft, men sant skal seiast, vi har berre møtt velvilje etter at vi fekk stengingsordre.

Dialog har vore løysinga

Grunna ferieavvikling har ting teke tid og stengingsperioda blei lengre enn Andersen håpa då han fekk beskjed om å måtte stenge dørane.

– Alle etatar og samarbeidspartnarar vi har vore i dialog med heile vegen vore innstilt på å finna løysingar og få ting på fote igjen.

– Eg må få trekkje fram huseiger Anders Fagerthun, som har vore ei uvurderleg støtte. Han har eg kunne prata med seint og tidleg.

– Som Anders seier, dialog er nøkkelen. Berre vi har satt oss ned med mynde, rådgjevarar og andre, så har vi kome fram til løysingane.

– I dag tidleg var kommunen her på den siste befaringa. Dei var nøgde med rømningsvegar og det som trengtes for å kunne gje oss midlertidig bruksløyve.

– Framleis gjenstår nokre av dei tinga arbeidstilsynet har peika på, som ventilasjon, men dette har vi ein plan på og dialogen med tilsynet er bra, avsluttar Bjarte Andersen, som med det nye løyvet kan ta imot 190 gjester.