Emil (12) skulle sjå sin første kamp på Old Trafford
– Kva skjer med kampen no då, pappa, sa Emil Pedersen Matre (12) då Old Trafford i dag blei evakuert.
Bildeserie:
– Han spurde sjølvsagt om kvifor vi måtte ut, men det verka som om han var meir uroa for kampen, seier pappa Tore Matre.
Mange hundre nordmenn, fleire av dei frå Os, var blant dei som måtte evakuera då det i dag blei funne ein bombeliknande gjenstand på Manchester United sin berømte stadion, Old Trafford.
– Vi skulle sjå kampen med Emil sin onkel, Eirik, som hadde skaffa VIP-billettar, og sat i losjen og åt før kampstart, fortel den tidlegare noregsmeisteren i handbak.
Onkel Sverre (Lunde Pedersen) skulle òg vore med, men det passa ikkje med treningsopplegget til skøytestjerna.
«Code red»
Det som skulle bli Emil sin første dag på tribunen på Old Trafford blei brått spennande på eit anna vis enn venta.
– «Til alt tryggleikspersonell; code red» sa dei over høgttalarane. Så såg vi at dei byrja å senda ut publikum frå den eine halvdelen av stadion.
– Vi fekk først beskjed om å halda oss i ro, men så byrja folk å lesa nettaviser og det byrja å spreia seg litt panikk. Vi fekk ny melding, om at også vi òg måtte evakuera.
Politi rundt heile stadion
Då dei kom ut var det ikkje lenger snakk om å gå roleg mot portane.
– Politiet jaga på oss og ba oss skynda oss. Det sto fleire hundre politimenn rundt heile stadion og situasjonen blei ganske kaotisk, fortel Tore.
VG.no skriv at det blei funne ei falsk bombe og at denne blei destruert. Kampen blei avlyst.
Tilbake i London
Mens onkel Eirik kom direkte til Manchester har Tore og Emil vore i London sidan fredag.
– No er vi tilbake i London, flyet vårt til Bergen går i morgon.
Dei to er glad for at situasjonen er over, men skuffa over at dei ikkje fekk sjå Manchester United - Bournemouth.
– I tillegg til opplevinga av å sjå siste serierunde sto det ein del på spel. United kunne tatt den viktige 4. plassen og kvalifisert seg til Champions League, om ikkje City tok poeng.
– No enda jo Swansea - Manchester City 1-1, så då trur eg United må vinna 28-0 for å vippa City ned frå 4. plassen. Det hadde vore spennande å følgja dei to kampane i dag, men sånn blei det dessverre ikkje.