Elias skåra 4 mål for Brann 2
Måljegeren frå Os gjer god figur i SK Brann.
Elias Heggland Myrlid (19), som gjekk til Brann i vinter, har halde opp den enorme målteften han hadde på Os.
I går skåra han 4 mål for Brann 2, som slo Årdal 8-0 i Os si 3. divisjonsavdeling.
– Vi visste kva som møtte oss, det blei ein kamp mot etablert forsvar. Men det er vi vant med, seier Elias.
Elias skåra desse måla: 2-0, 4-0, 6-0 og 7-0, to før pause, to etter.
– Det viktigaste på ein fotballbane
I fjor haust, då seniorfotballen var pandemistengt, skåra Elias 17 mål på 9 kampar for Os sitt juniorlag.
Totalt på 52 kampar sidan 2018 har han skåra 56 mål, noko som gjorde at SK Brann inviterte til trening.
– Elias har gjort eit veldig godt inntrykk. Han er ein spelar som er veldig god i boks, har ei eiga evne til å lukta mål. Han har vist at han kan gjera det viktigaste i fotball, nemleg skåra, sa Brann 2-trenar Azar Karadas til Midtsiden i januar, etter at Elias hadde signert kontrakt.
No er Elias ein av Brann 2-spelarane som er B-lista. Å vera B-lista betyr at du har lov å spela Eliteserie eller OBOS, altså at A-laget har lov å bruka deg til inntil tre kampar utan å signera proffkontrakt.
23 mål på 13 kampar i år
I vårsesongen, før Norsk Tipping-ligaen opna etter pandemien, har Elias spelt for Brann sitt juniorlag, både i lokal G19-serie og nasjonal juniorserie.
Der har det blitt totalt 18 mål på 11 kampar. Til no i Norsk Tipping-ligaen står han med 5 mål på 2 spelte kampar.
– Korleis har du det i SK Brann?
– Veldig bra! Vi er ein ung gjeng, frå 15 til 19 år, som har trent mykje og hardt, opptil 10 økter i veka, i vinter.
– Merker du at du har hatt god utvikling?
– Ja, på fleire måtar. Med meir trening har eg blitt sterkare og fått betre kondisjon, i tillegg har teknikken blitt betre, synest Myrlid.
No gler han seg til neste kamp, som går mot Lysekloster søndag om ei veke.
