Eit regionalt sentrum

Fylkeskommunen har på desse dager forslag til Planprogram for regional areal- og transportplan for Bergensområdet ute til høyring. Formannskapet handsama tysdag Os kommune si uttale til planen.

– Sjølv om det framleis er på planprogramstadiet er signala veldig sterke på at fylket har landa ned på ei modell med desentralisert konsentrasjon.

– I korte trekk betyr det at i tillegg til Bergen sentrum vil ein konsentrera utviklinga med småbysentra på Osøyro, Kleppestø, Arna, Straume og Knarvik, fortalte ordførar Terje Søviknes.

I tillegg vil aksen mellom desse sentra og Bergen vera viktige både i høve bustadutbygging og kollektivtransport.

Sjå til Vestfold

Søviknes refererte til høyringskonferansen for planprogrammet. Ein konferanse han beskreiv som god.

– Det var gode foredrag frå andre vekstregionar som har kome eit steg lengre enn oss i slik overordna planlegging.

– Vestfold var nok det beste eksemplet kor fleire småbyar ligg med kort avstand med sine vekstutfordringar.

– Deira arbeid vil nok ligga som eit fundament som kan kopierast i stor grad inn her.

Høgre hus i sentrum?

Nasjonale styresmakter, mellom anna gjennom fylket, har gjeve tydeleg signal på at ein ønskar høgare og tettare utvikling i staden for å spreie utbygging utover større areal.

– Vi må nok ta innover oss desse signala.

– Det betyr at vi bør ta oppatt sentrumsplanen frå 2007 for å sjå ein gong til på høgde og fortettingspotensialet.

– Det kan tenkast at sentrumsplanen blir utfordra på enkelte områder på dette, meinte Søviknes.

Signala går på at kommunene må følgja opp. Os er eitt av småbysentra som allereie er peika ut.

Ingen vits å kjempa mot

Rådmann Knut Terje Rekve har vore del av programkomiteen for planprogrammet.

– Av og til kjem slike megatrender inn over deg. Du klarar ikkje å kjempa mot.

– Det er berre å følgje med. Eg trur Os kommune og Os sentrum har alt å vinna, påpeika rådmannen.