– Eit normal-år utrykkingsmessig

– Vi har hatt 237 oppdrag med legevaktbilen i 2015. I tillegg har vi rykka ut til 26 first responder-oppdrag når ambulansen har vore oppteken på anna hald og AMK har hatt behov for hjelp. Då har gjerne legevaktlegen rykt ut med legevaktbil, og to brannfolk med ein liten brannbil for å bistå, fortel Monsen.

Svingande tal

– I 2015 hadde vi sju bygningsbrannar, alt frå mindre omfattande brannar til totalskade. Ein av desse brannane var påsett. Dette talet svingar veldig frå år til år. I fjor hadde vi to bygningsbrannar på ein dag då Nina herja i januar i fjor.

– Generelt sett kan eg seia at kjøkkenet er ein farleg stad når det gjeld brann. Matlaging og bruk av levande lys er ofte årsaka til bygningsbrannar.

– Elles har vi kring 8000 piper i Os. Likevel kom vi ifrå året med berre fire pipebrannar.

Normal-år

Heller ikkje ulike framkomstmiddel slapp unna branntilfelle i året som gjekk.

–Vi hadde fire brannar i køyretøy og ein båtbrann i 2015. Men generelt sett vil eg seia at det har vore eit normalår med omsyn til talet på oppdrag. Og vi har – bank i bordet – ikkje hatt dei store hendingane innan brann og ulykker, seier Monsen.

Monsen fortel at det har vore 12 tilfelle av akutt forureining i året som har gått.

– Det kan vera hydraulikk-slangar som ryk slik at det vert oljesøl av det, forureining i samband med landbruksdrift og liknande. Dette er tilfelle som vi rykkjer ut på og registrerer og sanerer om det er naudsynt. Då er det forureinaren som må betala.

Ingen skogbrann

– I tillegg har vi hatt to tilfelle av gras- og lyngbrann, men heldigvis ingen skogbrannar i 2015. Sju utrykkingar er registrert i samband med vannskade eller oversvømmingar.

– Vi har sju godkjende redningsdykkarar i staben vår, og desse har hatt ti oppdrag i fjor. Ingen direkte søkeoppdrag etter drukna personar, men til dømes å fjerna tauverk frå propeller til Hardangerfjord-ekspressen eller undersøking av kaiforhold.

Havnesjef-utrykkingar

Av hendingar utløyst av automatiske alarmar av ymse slag har 14 vore i samband med automastiske bustadalarmar, og 47 til institusjonar, hotell og slikt.

– Vi rykkjer ikkje ut med mindre med er utslag frå meir enn ein detektor, men denne type oppdrag utgjer ein god del av statistikken vår, seier Monsen.

– Resten av utrykkingane i 2015 er registrert som andre oppdrag eller brannhindrande oppdrag. Havnesjefen har sytt for nokre lufteturar, elles kan det vere kattar som har stått fast i tre over ein lengre periode, døde hjortar som ligg og flyt i sjøen, eller folk som sit fast i ein heis ein eller annan stad, seier Monsen.

– Eg vil gjerne poengtera at vi i brannvesenet er glade i dyr, og skal hjelpa når det er heilt nødvendig, men om katten din klatrar opp i eit tre så rykkjer vi ikkje ut etter ein halvtime for å få katten ned att, legg han til.

Godt førebyggjande arbeid

Brannvesenet driv utstrekt førebyggjande arbeid, mellom anna har dei alle sjetteklassingar i kommunen på besøk kvart år.

– Dette har nok vore med å bevisst gjera ungdomane, og vi ser færre tilfelle av branntilløp utandørs der unge leikar seg med tennstikker. Elles ser vi at folk bur lengre heime, og den opne omsorga er godt utbygd i Os. Og betre vil den vel bli, og då er brannvern svært viktig. Komfyrvakt bør absolutt på plass alle stader, særleg der eldre bur heime.

– Feiarane i kommunen driv også veldig godt førebyggjande arbeid. Og der ein ikkje klarar å fjerna all sot på vanleg måte er dei ofte tilbake og fresar ut beksoten. Dei har god oversikt på tilstanden i pipene i Os.

– Elles kan eg legga til at vi fekk høgdereiskap på plass i sommar. Vi har hatt opplæring på den no i haust, så no er liften klar til innsats. Dette er ein god ting vi har hatt på ønskelista vår lenge, avsluttar Monsen.