Eit kast verdt 840.000 kroner
Kystfiskar Johannes Røttingen har hatt to effektive turar til Tromsø. I går fekk han så mykje at det blei litt til overs til spekkhoggarane.
Bildeserie:
I desember reiste Johannes Røttingen med mannskap til Tromsø med 13 meter lange MS «Elias» og fiska heile 2015-kvoten på NVG-sild på 10 timar.
– Vi la båten igjen og tok fly heim for å feira jul. No reiste vi opp igjen for å ta årets sildekvote, seier Johannes.
I går fiska han årets kvote, 180 tonn, på to kast i Kaldfjorden rett vest for Tromsø.
Prisen er grei, med 7 kroner per kilo blei det 1,2 millionar omsetnad på nokre få timar effektivt fiske.
– Ved å legga båten igjen nokre veker fekk vi to turar i eitt, seier kystfiskaren, som nett har starta på den 4,5 dagar lange reisa heim til Os og Øyane.
Omringa av kval
Med sild følgjer også ofte spekkhoggarar. I tillegg har Røttingen med mannskap, pappa Elling og kameraten Torgeir Seim, sett mykje knølkval denne turen.
– Eg har aldri sett så mykje kval før. Vi har òg sett knølkval som hoppar.
– Spekkhoggaren sirklar rundt bruket og tar fisk som kjem utanfor nota, mens knølkvalen kan vera meir tl bry. Det er båtar her oppe som har fått knølkval rett inn i nota, og mista fangste i tillegg til at dei har lagt i dagevis og sydd på nota.
Sjå video på facebooksida til MS Elias.
Røttingen fortel om mykje turisme i området.
– Det har vore både japanarar og sørafrikanarar bortom og spurd om å få vera med oss ut. Mens vi fiskar ser vi mange turistar på kvalsafari. Eg forstår at dei tar turen, det er fint å oppleva kval på nært hald.
Ønskjer seg større kvote
Det går i eitt fram til påske for kystfiskarane. Røttingen skal heim og skifta mannskap og rigga om frå not til garn. Så er det til Møre for å fiska sei og torsk.
– I april og mai blir det fri. Då skal båten på vedlikehald før vi i slutten av mai skal ut på og fiska leppefisk.
Også makrellfiske er del av omsetnaden.
– Når vi ser kor mykje sild det er så skulle eg ønskt kvoten var større. I 2012 hadde vi kvote på 600 tonn NVG (norsk vårgytande) sild. Eg synest 180 tonn er lite. Bestanden har auka kraftig, men forskarane er dessverre ikkje einig med oss fiskarar si oppfatning.
– Uansett har det vore ein fin tur i nord. Det er dagar som dette det er ekstra kjekt å vera fiskar, seier Røttingen, nøgd etter brakstarten på 2016.
Johannes vore kystfiskar sidan før han var ferdig med ungdomsskulen. Han kjøpte sin første sjark då han var 17 år, MS Elias kjøpte han i 2009.