Eit budsjett for vekst og utvikling

Frp/H/KrF/V la tysdag fram felles Os-budsjett for 2014 og Økonomiplan 2014-17. Investeringsdelen av budsjettet strekk seg heilt fram til 2020.

Budsjettet er eit budsjett for vekst og utvikling i Os.

I perioden fram til 2020 skal kommunen investera heile 1,4 milliarder kroner i ny infrastruktur. Dette er naudsynt for å gje noverande og framtidige osingar gode kommunale tenestet inn i framtida.

Hovudsatsingane er;

Skule
•Rehabilitering av Os ungdomsskule og nye Nore Neset skule (2014)
•Tilbygg Kuventræ skule (2014)
•Nybygg Lysekloster skule (2014-15)
•Utbygging av gymsalar/kulturbygg v/det gamle badet på Os Ungdomsskule
•Ny skule aust om elvo (2017-19)

Omsorg
•PU-bustader Khunle (2014)
•Ca 60 ny omsorgsbustader Luranetunet (2015-16)
•Rehabilitering/ny sjukeheim (2018-19)

Os Idrettspark – Kuventræ
•Ny dobbel idrettshall, kunstgrasbane og friidretsanlegg (2014-16)

Vatn og avlaup
•Nytt hovudreinseanlegg OHARA (2014-16)
•Høgdebasseng og rehabilitering av leidningsnettet

I tillegg kjem ei rekkje mindre prosjekt innan samferdsel, Os Hamn, IKT, Liv på Øyro osv. Prosjekta vil i hovudsak måtte finansierast med lån, men også med inntekter frå eigedomssal (t.d. Askviknes, Mobergslio, Livet langs linjo).

Auka kapitalkostnader gjer at vi må halda igjen på andre driftskostnader i kommunen. Koalisjonen FrP/H/KrF/V har likevel funne rom for å auka satsinga på primærtenestene våre med ca 5 mill kr i 2014.

Innan skule vert Kuventræ bygd ut til neste år slik alle elevar frå sentrum får plass på ein av sentrumsskulane hausten 2014.

I tillegg har vi sett av 2 millionar kroner til oppfølging av prosjekt Betre læringsresultat, - særleg med fokus på God skulestart i 1.klasse.

Innan helse og omsorg vert det rom for utvida dagtilbod til demente i Gamleheimshagen, ny stilling innan ergo-/fysioterapi, auka tilskot til ettervern for rusavhengige gjennom Vindfanget, samt generell styrking av omsorgstenestene.

Også byggvedlikehald og vegvedlikehald er tilgodesett med 0,5 mill kr kvar.

Dette kjemp på toppen av rådmannens budsjettframlegg som la til grunn vidareføring av dagens drift også i 2014, med full kompensasjon til driftseiningane for både prisvekst, lønsvekst og auka pensjonskostnader. Samla er det derfor lenge sidan Os kommune har hatt eit så godt utgangspunkt for eit nytt budsjettår.

At Os kommune no har kontroll på økonomien er takka væra godt samarbeid mellom politikarane, administrativ leiing og tillitsvalde.

Vi har i fellesskap hatt vilje til styring. Framleis er det nokre tenester og einingar som må betra økonomistyringa, men som økonomisjef Ingrid Karin Kaalaas uttalte i budsjettprosessen; - no har vi kontroll på økonomien, og ikkje økonomien kontroll på oss.

Dette må halda fram også i 2014. Gode budsjett krev også god budsjettdisiplin.

Frp/H/KrF/V vil takke for alle gode innspel gjennom budsjettprosessen, både frå administrasjonen i kommunen og innbyggjarar. No skal budsjettframlegget liggja ute til høyring fram til kommunestyremøtet 17. desember. Når endeleg vedtak er fatta ser vi fram til eit nytt spanande år med fokus på vekst og utvikling av Osbygdo.

Terje Søviknes (Frp)
Marie E. Bruarøy (H)
Helge Olav Nygard (KrF)
Jon Sivert Rykkel (V)