Eirik syng duett med Gaute
Eirik Strønen Søfteland fortel korleis han vil synga My Way på "den rette måten" - og om ei lita overrasking til kveldens Idol-sending.
Eirik imponerte med eigenkomponert låt førre fredag, gjekk til topps på iTunes og ligg no på 6. plass på VG-lista.
Fire finalistar står igjen når Idol i kveld klokka 20 går i gang nest siste runde før superfinalen.
Osingen Eirik skal som kjent synga Sinatra-låta "My Way".
Men korleis vil han framføra ei så kjent låt, ei låt som så mange har sunge før han, både Sinatra, Elvis, tidlegare Idol-finalist Gaute Ormåsen – og av uendeleg mange 60-70-åringar på firmafest og bryllaup?
– My Way er enkel og vanskeleg. Låta er enkel å synga seg gjennom, men vanskeleg å synga på rett måte, seier Eirik til Midtsiden etter fredagens kameraprøve på TV2.
– Låta er skriven til Frank Sinatra av Paul Anka. Anka blei inspirert til å skriva låta etter at dei to kameratane hadde hatt seg noko whiskey saman på ein pub, og Sinatra hadde fortalt om opp- og nedturane sine. Musikken var frå før laga av ein tysk komponist, fortel Søfteland, som fleire gongar har fått høyra at han er den i Idol som har "mest musikk i seg".
– Det handlar om å formidla, om du vil gjera My Way skikkeleg. Det er det eg skal prøva på i kveld, å formidla My Way slik det skal gjerast.
– Ingen rocka vri, altså?
– Det blir klassisk og pompøst, sånn det skal vera, men litt "edgy", blant anna med innslag av gitarspeling, røper han.
– Og du stiller i dress med stram flette?
– He, he! Nei, eg stiller som Eirik, men eg pyntar meg litt i dag.
Byr på duett - med Gaute!
Finalistane har i kveld valt låtar som tidlegare har vore gjort til Idol-magi av Alejandro Fuentes, Gaute Ormåsen, Aleksander With og Erik Flaa.
Desse tidlegare deltakarane er med i kvelden show, melder Idol Norge på Facebook i dag.
– Det stemmer. Eg skal synga duett med Gaute og vi har valt låta "Say Say Say" av Paul McCartney og Michael Jackson, seier Eirik.