Ein særs god kamp
...men likevel null poeng. Osherrane låg under med fem mål til pause, tok att forspranget, men klarte ikkje vippa det til siger.
Det blei høgdramatisk i Oshallen laurdag då herrelaget til Os tok i mot serietoar Kjøkkelvik til oppgjer. Dette var ikkje berre ein kamp om to poeng, men òg å sikra seg ein god posisjon med tanke på opprykk før serieinnspurten.
- Vi er framleis med i kampen om opprykket, slik det ser ut så vil dei tre første laga rykke opp.
- Ein av dei plassane skal vi ha.
Ostrenar Leif Idar Røen er optimistisk, sjølv om laget hans mista to poeng etter 25-26 tapet for Kjøkkelvik.
- Ein j.... bra kamp
Røen er særs nøgd med kva gutane presterar.
- Det blei ein kamp med høgt tempo. Gutane leverar eit godt spel og ein utruleg god moral.
- Diverre er det eit par på parketten som bidreg til at vi iallefall ikkje hadde heimebanefordel på laurdag, seier Røen.
Tre gongar var Os igjennom og satte ballen i mål, men blei avblåst og fekk frikast i staden.
Blodet rant
At det var tøffe tak mellom dei to laga fekk Jørgen Wold kjenna.
- Han fekk eit kutt over auge. Frode Vindenes, som er lege, plastra han saman så han kunne helde fram å spele, men mot slutten berre rant det.
Etter kampen måtte Wold ta turen på legevakta og få sydd augebrynet saman igjen med tre sting.
Einar stengte
Kampen starta med at Os i første omgangen ikkje klarte å omsetja sjansane dei fekk til mål.
- Det er den enkle forklaringa på kvifor vi ligg under til pause. Vi bommar rett og slett for mykje.
- I andre omgangen stengjer Einar Godø buret. I tillegg kjem presisjonen framover seg og då tek vi igjen dei 5 måla på berre sju og eit halvt minutt.
Resten av omgangen følgjer dei to laga kvarandre tett. Os har sjansen til å gå forbi, men klarar aldri å komma meir enn ajour.
Allereie fredag kan Osherrane få hevn då dei igjen møtar Kjøkkelvik i Scandic Cup, ein cup kor lag frå 2. til 4. divisjon møtast i ein lokal variant av NM.