Ein plass å varma seg
After ski-restauranten "Pudder Kafé" frå Myrkdalen kan få nytt liv på Kuventræ. No har Os Turn fått godkjenninga dei treng frå kommunen.
Vind og vèr på Kuventræ kan vera surt når ein står forfrossen på sidelinja medan poden spelar fotball på kunstgraset. No vil Os Turn gjera tilhøva betre både for foreldra og spelarane.
– Vi har jobba med fleire løysingar av husvære ved kunstgrasbanen.
– Det vi no ønskjer å gjera er å kjøpa dei åtte brakkene som har vore varmestue i Myrkdalen og flytta dei til Kuventræ, fortel dagleg leiar, Hans Parnefält.
Vil ta ein ekstra titt
I sluten av førre veke godkjente kommunen plasseringa av brakkene, no gjenstår berre å gå over brakkene ein ekstra gong, før avgjerda om å kjøpe brakkene fell.
– Brakkene står i dag ved Lagunen i Fana.
– Vi kjem til å reise ut der med bygningskyndige folk ein av dei næraste dagane for å ta dei ekstra i augesyn.
– Dei må vera i så bra stand og sjå så bra ut at vi ikkje dreg på oss ekstra med arbeid.
– Du veit, ser dei rufsate ut, så er det fort dei blir utsett for hærverk, seier Parnefält.
Sosialt for foreldra
Dei åtte brakkene er kvar på 8,6 x 2,5 meter og vil kosta klubben rundt 100 000 kroner i innkjøp. I tillegg kjem nokre kostnader knytt til grunnarbeid og tilkobling av vatn, kloakk og elektrisitet.
– Det er ei toalettbrakke, ei kjøken og lagerbrakke og seks brakker som vil fungera som opphaldsrom.
– Heile sida mot banen vil ha vindauge, så ein kan stå godt og varmt inne og sjå på medan ungane trenar.
– Eg håper varmestova kan bli ein sosial samlingsplass for foreldre, i staden for at dei sit i kvar sin bil eller stressar med køyring og henting.
– Her kan ein koma med ei god bok eller dagens avisar og slappe av medan ungane utfoldar seg, seier den daglege leiaren.
På plass før jul?
Varmestova vil bli plassert mellom parkeringsplassen og kunstgrasbanen ved siden av ballbingen på Kuventræ, med moglegheiten for å koma forbi på båe sider.
– Det er ei god plassering, som ikkje låser resten av området.
– Om inspeksjonen seier at dei er i god nok stand, så håpar eg vi kan få den på plass før jul.
– Det er no vi treng den, meir enn til våren, avslutter Hans Parnefält.