Ein ny Jordal på veg
Johannes har ein veslebror: Knut Jordal (9) kan bli ein ny komet frå Os.
Under Bjørnefjorden Cup første helga i juni la vi merke til ein ballsikker kvitkledd kar. Han var ikkje høgast på laget, men han sprang sikksakk mellom motspelarane og putta mål etter mål.
– Det er veslebror til Johannes Jordal. Han bur tvers over vegen for banen til Lysekloster og trener fotball frå morgon til kveld, fortalte ein av foreldra om Knut.
Knut Jordal fylte 9 år i januar, men går i klasse med, og speler fotball på lag med dei som som fylte 9 i fjor. I Bjørnefjorden Cup skåra han 10 mål på fire kampar.
Følgjer storebror
Johannes, som fyller 17 år i september i år, kom frå Lysekloster til Os i fjor. På våren debuterte han på juniorlaget, i agust imponerte han i sin 3. divisjonsdebut for Os 2.
– Knut følgjer med på kampane og kjem med gode tilbakemeldingar etter at eg har spelt, både på kva eg gjorde bra og på ting eg kan gjera betre, fortel Johannes.
Johannes er både god i duellspel og ein farleg skyttar, han skåra blant anna 6 (!) mål i ein Os 2-kamp i vår. Men veslebror Knut kan bli minst like god.
Fotball ute - fotball inne
– Han er utruleg flink til å trena. Når han ikkje trener sit han heime og ser fotballkamp, skryt 16-åringen av veslebroren.
Knut er altetande når det kjem til fotball på TV, men har to lag han liker betre enn andre.
– Arsenal er best. Og så liker eg Brann, seier Knut Jordal.