Éin mista lappen - ein annan hadde ikkje lappen
Ein annan bilist måtte halvera vekta i hengaren.
Politiet har hatt fleire trafikkontrollar i helga.
Fredag i 09.40-tida gjennomførte utrykningspolitiet promillekontroll på Halhjem ferjekai.
– Av 41 førarar var det éin som gav utslag, men på lågpromille. Vedkomande blei tatt med for blodprøvetaking, og det er oppretta sak, opplyser vakthavande ved Bjørnafjorden politistasjon.
Forelegg og prikkar
I 11-tida flytta UP seg til 80-sona på E39 Halhjemsvegen for å sjekka farten på bilar med retning sør.
– Det blei 14 reaksjonar. Høgaste fart var 97 km/t. I tillegg blei éin meldt for bruk av mobiltelefon.
97 km/t i 80-sona resulterer i 7050 kroner i forelegg og to prikkar på førarkortet.
Ulovleg bruk av mobiltelefon gir 10.200 kroner i forelegg og tre prikkar.
Natt til laurdag, klokka 04.45, kom politiet over ein bil på Halhjemsvegen.
– Det viste seg at bilførar ikkje har førarkort. Vedkomande blir meldt.
Ivrige hageryddarar?
I 10-tida laurdag formiddag blei ein bil med hengar kontrollert.
– Der var det overlast. Førar måtte halvera lasta for å få køyra vidare.
I 11-tida laurdag sjekka UP ein bil med hengar i Industrivegen.
– Hengar var ikkje typegodkjent for veg. Den mangla også lys og skilt. Bilførar er meldt.
Laurdag kveld hadde politiet ein episode med ein vanskeleg gjest som hadde tatt seg inn på ein utestad før opningstid, for så å nekta å gå frå staden.
Les meir om episoden i relaterte saker under.
