Ein lærerik kveld

Trygve Svensson blei i starten av mai tilsett som statssekretær for nærings- og handelsminister Trond Giske.

Dei siste dagane har han brukt til å besøka gründerar på Vestlandet for å læra meir om verksemder i kryssinga mellom kultur og næring.

– Dette var ein perfekt plass å avslutta rundturen på, smilte statssekretæren då han blei møtt av ein parkeringsplass fylt av amerikanske bilar og ei alltid like strålande, Er-An-sjef, Linda Andersen.

Ville læra av dei beste

Saman med Kulturdepartementet og Kommunal- og regionaldepartementet har Nærings- og handelsdepartementet jobba med ein handlingsplan kalla “Frå gründer til kulturbedrift”.

Det var i den samanhengen statssekretæren ville få med seg tankane og utfordringane dei har opplevd på Er-An, som hadde nyopning i nybygg til påske i år.

– Reiseliv er i den samanhengen eit satsingsområdet. Vi kan nok aldri bli billigast i Noreg, men vi kan bli best.

– Då må vi læra av dei beste, og det er det dei har fått til her eit godt eksempel på, sa Trygve Svensson.

Fekk svar

Nærings- og handelsdepartementet har gjennom fleire tiltak forsøkt å gjera kvardagen for småbedrifter og gründerar enklare, mellom anna gjennom elektronisk lønsinnberetning og lignande. Dette ville han sjølvsagt høra om Er-An hadde hatt nytte av.

– Det har eg ikkje så mange tankar om, men då vi gjekk i gang med å bygga møtte vi på utfordringar vi ikkje hadde sett koma, fortalte Linda Andersen.

– Fleire runder måtte takast med fylket i forhold å få lov til å bygga mellom riksvegen og Røykenesvatnet, i tillegg måtte vi gå mange rundar med Arbeidstilsynet i forhold til krav dei kom med.

Krav om heis og hc-toalett

Linda Andersen fortalde ein lettare sjokkert statssekretær om krava som kom frå arbeidstilsynet.

– Eg tenkte eg ville gjera tilhøva best mogleg for dei tilsette. Difor ville eg laga eige pauserom i andre høgda, slik at dei slapp sitja saman med gjestane for å eta lunsjen sin.

– Då kom det krav om at vi måtte installera heis, slik at også røyrslehemma tilsette skulle koma seg opp, og det kom krav om minimum 2,70 under taket. Samstundes var det ingen krav om at kjøkenet skulle ha benkar tilpassa ein rullestolbrukar.

– I tillegg fekk vi krav om at vi skulle ha tre toalett til dei tilsette, kor eitt av dei skulle vera hc-toalett.

– No fekk vi etter ein del fram og tilbake, og med ganske store kostnadar, løyst saka. Men det viser berre kor avhengig ein er av å møta rett person i byråkratiet.

– Slik bør det ikkje vera, som ein liten bedriftseigar, som prøver å bygga opp ei verksemd med 8-10 arbeidsplassar, var det ganske utmattande å møta byråkratiet på denne måten, i staden for å få vegleiing og hjelp, forklarte Andersen, som samstundes nytta høve til å skryta av kommunen og korleis ho blei møtt der.

– Dette er jo utruleg. Sjølv om det du opplevde ikkje ligg under nærings- og handelsdepartementet kan eg lova deg at eg skal ta det opp med politikarane i departementet som har ansvaret, forsikra Svensson.