Ein god handverksdag
Bildeserie: Laurdag var det tid for tradisjonshandverk, Oselvarfestival og den gode praten på Øyro. Eit innhaldsrikt og veldig barnevenleg program trekte mykje folk.
Bildeserie:
Fram til neste søndag skal Kulturminnedagane markerast i Os.
I eit spanande og innhaldsrikt program finn du mellom anna prøvetimar med kajakk, kurs i rosemåling, lesestund på biblioteket, lansering av Os-ordspelet og to særs ekslusive konsertar med Marius Neset på Lyngheim.
Handverksdag med korps
Os skulekorps opna det heile med mini-konsert og fellesmarsj mellom gjestebrygga og Vognhallen.
Vel frame i Vognhallen helste leiar av Fortidsminneforeininga Os lokallag, Ingebjørg Astrup, publikum velkomen før ho gav ordet vidare til kultursjef i Bjørnafjorden kommune, Erik Vangsnes.
Både Astrup og Vangsnes hylla dei lokale drivkreftene som held handverkskunsten i hevd. Vangsnes, som kjem frå stillinga som kulturleiar i Fusa kommune, meinte at både Fusa og andre kommunar burde sjå til Os på korleis ein burde arbeida med kulturminnevern.
Astrup på si side trekte liner mellom Osdagane på 1940- og 50-talet, vidare gjennom Fritio på 70- og 80-talet og heilt fram til Kulturminnedagane i år.
– Det er fleire likheitstrekk å spora gjennom historia her, sa Astrup.
I Vognhallen kunne publikum koma tett på 15 handverkarar som mellom anna viste fram grindbygg, metallstøyping og spinning. I tillegg hadde arrangørane verkeleg hadde lagt til rette for ei rekkje aktivitetar for dei yngste, med tresnitt, trykk i leire, lesestund og dreiing i leire.
Strålande Oselvarfestival
Tidlegare har Oselvarfestivalen vore ein del av Kystsogevekene, og nokre år vart festivalen arrangert samstundes som Bondens dag.
At festivalen i år vart arrangert som ein del av Kulturminnedagane, slik at det vart aktivitet på begge sider av hamna, var eit godt trekk av arrangørane. Folk vandra mellom aust om, og vest om elvo, og på «Trekant-tomta» ved pumptrackbanen hadde samtlege parti (minus Frp - dei stod åleine i sentrum) rigga seg til for ein siste innspurt før valet.
Oselvarverkstaden hadde open verkstad, og i andre høgda hausta båtbyggjar Berit Osmundsen applaus og skryt for sitt føredrag om eit oppmålingsprosjekt verkstaden driv med, frå eit entusiastisk og interessert publikum.
I Oselvardraget mellom Oselvarverkstaden og Oselvarnaustet kunne ungane byggja sine eigne farkostar, tonesett til musikk frå Os Mannskor og Os Durspelsamskipnad.
Oselvarskyss, ja takk!
I Oselvarnaustet var det eit yrande liv med handverk, båtprat og mat i begge etasjar.
Gratis oselvarskyss mellom Oselvarnaustet og kaien ved Esso fekk heilt klart vatn å ro på, og mange meinte at no hadde Os endeleg fått sin eigen versjon av «Beffen» i Bergen.
Høgre raskast, men ingen slår John og Jostein
Før helga var det kun Høgre og MDG som hadde klart å mønstra roarar til den tradisjonelle kapproinga, men på laurdag stilte i tillegg Krf og Ap opp til konkurransen.
Høgre vann overbevisande med tida 3:55, og Krf tok andreplassen med tida 4:25.
Ap tok tredjeplassen med 4:54, og då Nils Anders Nøttseter i MDG-båten valde å innta yogaposisjon etter vending, var det lite Ole Henning Bøe kunne gjera. MDG tok sisteplassen med tida 5:15.
I den opne klassen var det, tradisjonen veldig tru, lite å gjera med John Lepsøy. Saman med med makkar Jostein Røttingen nær plana dei inn til tida 3:00.
Far og son Lunde tok andreplassen med tida 3:17, og tredjeplassen gjekk til Team Øvstedal og Larsen med tida 3:42.