Ein ekte bygdarevy

Bildeserie:

Full skjerm

1 av 11

For sjette gong set "Nor og Ne'" opp revy i Symrasalen i Nore Neset Aktivitetshus.

Frå starten i 2008 med "Vi har ei høne å plukke med deg" til årets revy "Bru kan flytta fjell" har revyen vore ein ekte bygdarevy som femnar om stort og smått som skjer i Osbygda.

Her slepp ingen unna!

Den raude tråden er som tittelen på revyen tilseier kampen for og mot bru over Bjørnafjorden. Både bruforkjemparar og brumotstanderar får gjennomgå, anten dei heiter Terje Søviknes eller Glenn Erik Haugland.

Men det er ikkje berre bru det handlar om. Revygjengen på Nore Neset har fått med seg ståa i sentrum, fuglelivet i elvo, servicenivået hos enkelte butikkar, Idol-hysteri og tilbodet på Oseana.

– Eg håper jo at enkelte stofer frå revyen kan bli "allemannseige" i kommunestyret, ler Thomas Helgesen om sketsjen dei har filma inne i rådhuset.

Les òg: – Trur vi toppa'n i år

Helgesen er tilbake som regissør etter ein liten pause, noko revy-eldsjel Susan Askvik set stor pris på.

– Det er godt å sleppa den jobben i år, smiler Askvik.

Musikalsk og konsist

Som musikalsk følgje, og til å styra lyd og lys, har revyen i år fått med seg elevar frå Kongshaug Musikkgymnas.

Begge delar sat nesten heilt perfekt allereie på første gjennomkøyring tysdag kveld, med generalprøve torsdag har vi tru på at det heile sit som eit skot til premiera fredag 24. mai.

Som revyen i Lysefjorden, lar underteikna seg imponera over musikaliteten og songnumra i revyen. I tillegg har Nor og Ne' gjengen vore flinke til å ikkje dra ut sketsjane i det vide og breie, men å halde kvart nummer relativt korte og konsise. Likevel har dei mykje på hjarta, noko som gjev ein revy på 2 x 45 minutt, med ei forfriskningspause i midten.

Får revygjengen på plass smårusket frå den første gjennomkøyringa fortener den ein klar femmar på Midtsiden-terningen.

Det er absolutt verdt å ta seg ein tur i Symrasalen ei av dei to helgene revyen blir spelt.