Eigarskifte hos Askeladden
Askeladden Boats AS har fått tre nye eigarar.
Bildeserie:
Askeladden Boats AS, som i 2009 overtok konkursboet etter at finanskrisa i 2008 sendte Henrik J. Askviks Sønner AS i skifteretten, har til no vore eigd av Mons Tore Lyssand (66 %) og Henrik J. Askvik (34 %).
– Då vi starta opp igjen hadde vi eit perspektiv fram til 2017 når det kjem til denne eigarstrukturen. No i 2016 byrja vi å sjå på framtida til Lyssand sine aksjar, fortel Askvik.
Partane blei einige om ein ny eigarstruktur der Lyssand trer ut av sin eigarposisjon.
– Mons Tore har på alle måtar vore ein klok og solid eigar. Han er ein dyktig forretningsmann og ein endå flinkare industrimann. Eg har aldri jobba med ein som har vist så sterk forretningsmoral og etikk, eller som har stått så stødig i tøffe periodar. Samtidig har vi hatt det utruleg morosamt saman, seier Askvik.
Den nye eigarstrukturen består av partar som alle kjem med viktige bidrag til selskapet, både i sitt daglege virke, men òg som strategiske samarbeidspartnarar.
Ny eigarstruktur for Askeladden Boats AS:
Henrik J. Askvik 60 %
Danvik Invest 20 %
Jonathan Dyrstad 10 %
Torry Drange Haugland 10 %
Fruktbart samarbeid
Danvik Invest er investeringselskapet bak E. Sande AS, som er Suzuki-importør til Noreg, og som har distribusjonsansvaret for Askeladden-båtane i den norske marknaden. Erling Sande bidrar også i produktutviklingsteamet til Askeladden.
– Då vi fekk distribusjonsavtale med Erling Sande bestemte vi oss for å bli den viktigaste båt-leverandøren deira. I dag er vi den største, både i volum og kroner, seier Askvik.
Dagleg leiar hos Erling Sande AS, Svein Helling, seier han set pris på samarbeidet frå oppstarten i 2009, til distribusjonsavtalen frå 2014.
– Samarbeidet har fungert veldig bra og det har vore fruktbart for begge partar. Ikkje minst er vi nøgd med at også forhandlarane våre tener pengar på sal av båtpakkane med Askeladden og Suzuki, seier Helling til Midtsiden.
Kontinuitetsbærarar
Jonathan Dyrstad (34) er salssjef i forhandlarverksemda som ligg under Båtens Beste og del av produktutviklingsteamet. Torry Drange Haugland (31) er teknisk sjef for Askeladden-produkta og er òg del av produktutviklingsteamet.
– Det har lagt som ein intensjon at Jonathan, som var ein av gründarane av Båtens Beste, då det var eige selskap, skulle inn igjen på eigarsida. Torry er ein som byrja i produksjonen tidleg på 2000-talet, men som tidleg viste ekstra initiativ og kompetanse, seier Askvik.
Også hos Erling Sande er dei glade for å ha Dyrstad og Haugland som medeigarar.
– Det har nok vore veldig fornuftig av Askvik å ta med desse yngre Askeladden-karane på eigarsida. Det viser at han tenkjer langsiktig, her har vi to gode kontinuitetsbærarar, seier Helling.
Askeladden Boats auka frå 83,7 til 109,3 millionar kroner i omsetnad frå 2014 til 2015.
Driftsoverskotet i 2015 var på over 3,9 millionar kroner.
Midtsiden samleside: Askeladden