Egil Special
Os var nær på innhenting mot Hundvåg i dag. Trass tap var det nokre lyspunkt, ikkje minst Egil Thuen, som lykkast med det han er best på.
Bildeserie:
Os tapte 1-0 borte for Hundvåg i juni og hamna under i dagens heimekamp. Til pause sto det 1-3.
Os stilte utan kaptein Stian Lunde (vekkreist), Preben Borgen (karantene) og Roar Vestbø (ute med skade), men kom i 2. omgang svært nær poeng.
Os - Hundvåg: 3-4 (1-3)
Målskårarar, Os: Christer Olsen og Egil Thuen 2
Olsen utlikna til 1-1, Egil Thuen reduserte til 2-3 og sørgja med 3-4-skåringa for at det blei spenning kampen ut.
– Dei to første baklengs burde vore unødvendig, det blei slått i bakrom og vips så var Hundvåg gjennom.
– Etter pause kom det seg og det var veldig kjekt å sjå Egil lykkast i dag. Han jobba hardt og fekk betalt, seier trenar Tore Nielsen.
Hardt skot og høg fart
Det har vore venta ein del av det store talentet, men det har blitt nokre småskader og nokre A-kampar der han ikkje har fått vist seg skikkeleg fram.
Men i dag såg vi Thuen sånn vi har sett han for juniorlaget og Os 2, der han bruker både det voldsame rykket sitt og dei to farlege skotbeina.
2-3-skåringa kom på eit knallskot etter at han sjølv hadde vore nesten i forsvaret og henta ballen, slått den på volley ut til høgre kant for så å få den tilbake og skyta hardt, men i fin boge over keeper frå 20 meter.
3-4-skåringa kom på kontring, der Egil kom frå venstre kant, parkerte høgrebacken til Hundvåg og la ballen kaldt forbi keeper og inn i lengste hjørne.
– Det er dette vi har venta på, eg håper og trur det gav både meirsmak og inspirasjon, seier Nielsen.
Også Christer Olsen var flittig og farleg på topp i dag og hadde nokre fine kombinasjonar saman med Thuen.
Os pressa i starten og slutten av 2. omgang i dag, hadde tre cornarar på fem minutt tidleg etter pause og skot av Olsen, Grøteide og Glesnes kort tid før slutt.
– Men det hadde kanskje vore urettvist om vi tok poeng i dag, Hundvåg var ein del betre enn oss, spesielt i 1. omgang, synest Nielsen.
Os: Frode Øvredal - Hadi Amiri, Torkel Hjertnes, Børge Borgen, Håvard Grøteide - Håkon Kvittingen, John Ole Johannesen, Mads Lepsøe - Stian Bakke, Ørjan Glesnes, Christer Olsen.
Innbytarar med speletid: Egil Thuen, Sander Kvittingen og Adrian Valle.
Os speler neste kamp borte mot Åkra laurdag om ei veke.