– Eg er sint

I kommunestyret tysdag ettermiddag skal politikarane handsama kravet Nils-Anders Nøttseter (MDG), Gisle Hesjedal (Ap) og Tone Hepsøe (Ap) satte fram om lovlegkontroll av godkjenninga av planprogrammet for reguleringsplan Hjelle skule.

I sitt framlegg til vedtak innstiller rådmann Christian F. Fotland på at kommunestyret opprettheld stadfestinga av planprogrammet og sender saka til Fylkesmannen for vurdering etter kommunelova § 59, inkludert spørsmålet om avvising av klagen.

Ikkje fatta avgjerd

I saksutgreiinga vurderer administrasjonen at ein ikkje kan krevja lovlegkontroll, då det ikkje er fatta ei avgjerd i saka.

– Ei avgjerd må anten avslutte ein prosess eller den kommunale behandlinga av saka om ho skal reknast som «endeleg».

– Stadfestinga av planprogrammet er ei avgjerd i saksbehandlingsprosessen, utan sjølvstendig rettsverknad, og det er altså ikkje høve til krevje lovlegheitskontroll av denne avgjerda, slår administrasjonen fast.

Utprega administrativ funksjon

I sitt krav om lovlegkontroll stiller mellomanna dei tre representantane spørsmålet om møta i styringsgruppa for skulebruksplanen skulle ha vore opne og følgd sakshandsamingsreglane i kommunelova kapittel 6.

Administrasjonen har gjort ei juridisk vurdering av styringsgruppa si rolle og konkluderer med at gruppa ikkje har hatt ei reell avgjerdsmynde.

– Den politiske deltakinga i denne gruppa og andre ad hoc-utval, har tradisjonelt bygd på ønsket om informasjonsflyt mellom administrasjonen og det politiske miljøet, der dei politiske representantane skulle vere bindeledd. Det kan med dette ikkje utelukkast at dei politiske medlemmane i slike grupper har hatt ein viss innverknad på val undervegs. Sivilombudsmannen har på grunn av dette fråråda bruk av denne konstruksjonen for informasjonsflyt. Det som er avgjerande er likevel kva val som er gjort og i kva grad desse er av offentleg interesse. Vi må difor sjå på korleis gruppa faktisk har arbeidd for å svare på om gruppa i realiteten har fungert som eit folkevalt organ.

– Dialogen i gruppa har gått føre seg gjennom fellesmøte. Alle deltakarane – både administrasjon og folkevalte – har på lik linje vore med og diskutert og tatt stilling til sakene som har vore drøfta. Formål med dialogen har vore å finne løysingar som kan gjennomførast. Gruppa har diskutert milepålar og framdrift i dei enkelte prosjekta. For skuleprosjektet aust om elvo har dei også vurdert ulike eigedomar og om desse har vore tilgjengelege for kjøp. Av dei tre eigedomane som vart vurdert, var berre ein tilgjengeleg.

– Det har difor ikkje vore det store rommet for politisk påverknad i dette arbeidet. Det er noko uklart for administrasjonen kva dei politiske deltakarane reelt sett har bidratt med i rolla som folkevalte, utover å motta informasjon om utgreiingsarbeidet. Oppgåvene ligg også prosessmessig langt frå dei politiske avgjerdsprosessane for arealbruk og økonomi, og kunne strengt tatt vore løyste utan deltaking frå det politiske miljøet. Administrasjonen meiner gruppa har hatt ein utprega administrativ funksjon og gjort eit arbeid som ikkje er av stor offentleg interesse.

Reagerer kraftig

Dette reagerer Nøttseter kraftig på.

– Administrasjonen har fulllstendig umyndiggjort Eirik André Hesthamar og resten av utvalet som demokratisk organ. I tillegg tar administrasjonen ein fullstendig snuoperasjon på demokratiske organ. Rådmann Christian Fotland lova meg personleg at kommunen framover skulle følgje lova med alle adhocutval.

– Eg er sint, men eg er i Afrika og rekk ikkje heim til møtet i kveld, beklagar Nøttseter i ei melding til Midtsiden.

Midtsiden dekkjer kommunestyremøtet i kveld og kjem tilbake med sak om korleis diskusjonen går i møtet.