– Eg er nøgd med angrepsarbeidet
Damelaget var god i starten og slutten av dagens serieopning og tar stortapet med eit smil.
Bildeserie:
Laurdag ettermiddag var det seriestart i Oshallen. Damelaget til Os tok imot Stord i ein kamp som starta og slutta jamt, men der heimelaget førebels ikkje er samspelt nok til å stå godt nok imot i forsvar.
– Med fleire ute og fleire comeback kjem vi til å bruka litt tid på å spela oss inn, og dette er mest synleg i forsvar. I angrep klarte vi oss greit, seier trenar Gitte Torp.
– Stord var gode og vi kjem til å spela betre enn dette utover i sesongen. No skal vi jobba ein del med forsvarsarbeidet. Det kom seg litt i andreomgang, Caroline Cook var blant dei som sto fram og tok mykje juling. Det skal gjera vondt å spela godt i forsvar.
Os - Stord 20-33 (9-15)
Målskårarar: Madeleine Hjertnes 6, Elise Hjelle 5, Silja Espeleid Lunde, Tonje Hjertnes 2, Malin Hjelle Berentsen 2, Marte Øvreeide, Hilde Kristine Røttingen og Malin L. Fosen.
2 minutt: Os x 1 (Malin H. B.)
Tilskodarar: 75
Os hang med og utlikna frå 0-2 til 2-2 og frå 2-4 til 4-4. Etter halvspelt førsteomgang sto det 5-6.
Vibeke Ingebrigtsen sto stødig i mål, men så byrja det å svikta framover med både stolpeskot og misbrukte sjansar då Os 3-4 gongar kunne ha kontra.
Saman med svakt forsvarsarbeid blei det opna for at gjestane kunne dra i fra.
Også starten på 2. omgang var svak for Os sin del, men Elise, som sette inn tre av tre frå 7-meteren i første omgang, sto for kampens første skåring på kontring på 14-25 og frå 15-28 blei det fem mål kvar på dei to laga.
Lite kamptrening - stor kampvilje
I tillegg til svak oppkjøring og stor utskifting fekk Os ingen treningskamp før seriestart. Fleire av dei meir rutinerte på laget har dessutan ikkje spelt på endå lengre stund.
– Eg fekk berre 5-6 kampar i fjor, sist eg spelte i Oshallen trur eg var i oktober i fjor. Tonje har ikkje spelt kamp på 1,5 år, seier dagen topskårar, Madeleine Hjertnes.
Svakt oppmøte på trening i mai og juni etterfølgt av berre to veker oppkjøring etter sommaren set sine spor.
– Men no er vi i gang og både humøret og spelelysta er på topp i troppen, seier Gitte, som allereie gler seg til neste runde.
Os møter Voss på bortebane i neste kamp, som går 22. september.
Sotra starta serien med å slå Jotun.
Os sitt herrelag speler serieopning borte mot Kjøkkelvik 2 i morgon kveld.