Dykkeklubb klar for kald dugnad i Os hamn
– Det er ei stund sidan sist, så det blir spennande å sjå kva vi finn.
Os Dykkeklubb, som har faste dykk kvar veke og base og båt ved Oselvarverkstaden, skal søndag leita etter andre ting enn fisk og kamskjell.
Då er det nemleg dugnad for å rydda botnen i Os hamn.
«Dette er eit tiltak for å få rydda hamna for boss, og fokusere på kor viktig det er med ein sunn og rein havbotn, skriv styremedlem, Jan Erik Moss Soltveit på Facebook-gruppa Oppslagstavlo i Os.
Klubben byr på kaffi og ein prat om publikum vil koma innom brygga i pausane. Då kan dei òg sjå kva som blir funne.
– Sist vi var på tilsvarande ryddeoppdrag var i Hatvika for to år sidan, seier styreformann Pål Hjertholm.
– Vi tar med oss oppsamlingsposar på botnen, som folk på land kan hala opp når dei er fulle.
Då blir jobben meir effektiv, og dykkarane slepp å gå opp og ned.
Trass 8-10 minusgradar, kvir ikkje dykkarane seg til oppdraget.
– Vi dykkar helst om vinteren, sikta er mykje betre då. Men det blir kaldt i overflata søndag, det er vi førebudde på, seier dykkar og styremedlem Hugo Jentoft.
– Kva er typisk å finna på slike rydde-dykk?
– Vi finn alt frå spøkelsesteiner (teiner utan tau til overflata) og båtutstyr til batteri og syklar.
– Og mobiltelefonar?
– Faktisk ikkje i Hatvika, men det kan jo henda vi finn det i Os hamn.
Dykkinga skjer i regi av Os dykkerklubb, men er støtta av Bjørnafjorden kommune og delar av næringslivet og handelsstanden i Os.
