Drøymde om...
..handball og kjøleskap. Niandeklassingar med rørande og sportye MOT-draumar.
Gjennom MOT-programmet som nyttast i ungdomsskulane i Os blir niandeklassingane utfordra på å skriva ned draumane sine. Nokre av dei får til og med oppfylt draumen.
– Det var ei rekkje fantastiske gode søknader.
– Hjå dokker var det fleire som hadde omlag dei same draumane. Og fellesnemnaren var handball, fortalde MOT-informatør Kjersti Tysse Plätzer då ho møtte elevane på Nore Neset ungdomsskule siste skuledag.
Saman med dei andre MOT-informatørane Anne S Andersson og Lill Siren Frantzen, og MOT-koordinator Ellen Merete Lyssand har Tysse Plätzer jobba for å få realisert nokre av draumane.
Får møta landslagsspelar
For dei 10 elevane på Nore Neset blir draumen om å møta landslagsspelarar i handball ein realitet.
– Eg har nett snakka med Karo (Karoline Dyre Breivang, journ.mrk), og ho sa; veit du Kjersti, det skal vi få til når eg kjem til Bergen til hausten.
– Då skal de i allefall få møta ho, sjå ein toppkamp, og kanskje få møta fleire gode spelarar, fortalde Tysse Plätzer før ho la til at invitasjonen gjaldt heile 98-laget til Nore Neset.
– Ein fantastisk draum
Ei anna som fekk draumen sin oppfylt var Christina Forstrønen Bruarøy frå Os ungdomsskule.
– Christina ønskte seg eitt nytt kjøleskap til oldemora si, Sara Bruarøy.
Sara er alltid gjestmild og ivrig med matlaging til barnebarn og oldebarn som kjem på besøk, men hadde eit upraktisk kjøleskap med frys oppe og kjøl nede.
– Ho er ei sprek dame, men ho har operert hofta fleire gongar, og eg synest ho skal sleppa å bøya seg så mykje kvar gong ho skal ta noko inn eller ut av kjøleskapet. Og det er ganske ofte, skreiv Christina i søknaden.
– Dette var ein draum vi berre måtte realisera. Den går rett i ein av MOT sine kjerneverdiar, nemleg det å bry seg.
– Det var rett og slett ein fantastisk draum, smiler MOT-informatøren som legg til at også på Søfteland ungdomsskule fekk ein elev draumen om å gjera noko spesielt for foreldra sine oppfylt.