Dømt til 19 år

19-åringen møtte tysdag i Nordhordland tingrett for å få opplest dommen i saka der han står tiltalt for å ha valdtatt og drept 98 år gamle Hilda Feste i Oshaugen 1. januar 2012.

I sin sluttprosedyre tysdag 20. november meinte aktor Gert Johan Kjelby at bevisbildet var overveldande.

- Det er ført bevis for alle punkt i tidsrommet frå han gjekk frå festen hos kameraten til han blei oppdaga på Hilda Feste sitt soverom, meinte aktor.

19-åringen blei i dag dømt til 19 år fengsel og til å betala 200.000 kroner i oppreising.

Tiltalte må også betala 89.000 kroner i erstatning og 49.000 kroner i erstatning for framtidige utgifter til Hilda Feste sine nærmaste.

Gjennom dei fem rettsdagane saka varte fekk retten presentert bevisa politiet meinte dei hadde mot guten:

• Finger- og handflateavtrykk frå guten i blodet på åstaden.
• Finger- og handflateavtrykk frå guten på ytterdøra til Hilda Feste.
• Identiske DNA-treff frå 19-åringen på buksa til den drepte 98-åringen.
• Han peika sjølv ut skoa han hadde brukt første nyttårsdag. Ifølgje politiet er det "sannsynlegvis" desse som har sett avtrykk i den drepte sitt husvære.
• Funn av putetrekk og tekstilar med den drepte sitt blod i ein bossekk heime på soverommet til 19-åringen.
• Funn av blod frå den drepte på ytterdøra i heimen til tiltalte, også i trappa ned mot soverommet hans blei det funne blod frå den drepte.

Guten sin forsvarar, Rolf Knudsen, hevda i sin prosedyre at guten måtte frifinnast, subsidiært at han måtte dømmast på mildast mogleg måte.

- Bevisa indikerer at tiltalte har vore hos Hilda Feste, men det er ikkje nok. Det skal bevisast at han har utført dei handingane han er tiltalt for, argumenterte Knudsen.

Midtsiden.no er i rettsalen og kjem tilbake med reaksjonar og dommarane si grunngjeving.