Dømt etter drapstrugslar og innbrot

Ein mann i 40-åra busett i Os er dømt for innbrot, oppbevaring av narkotika, blant anna over 30 gram amfetamin, og for fleire tilfelle av alvorlege trugslar.

I april 2013 truga han ein tilsett ved eit bufellesskap med kniv, i desember 2013 truga han ein tilsett ved eit apotek over telefon med at det ville koma nokon med skytevåpen så dei burde ha medisinen han bad om klar. Same månad truga han ein annan offentleg tilsett med at han skulle voldta døtrene hans.

I september 2013 truga han ei tilsett ved legevakta i Os over telefon. Han sa han hadde fått tak i ein revolver og at han håpa på å drepa nokon som fortente det. Trugslane kom i forsøk på å få utlevert medisin.

Då han ville snakka med ein tilsett ved Nav på Os, og vedkomande var i møte, sa han at han ville koma ned på kontoret, dra ho ut frå møtet og skyta ho. Dette var i februar 2014.

I april 2015, i Bergen, truga han ei kvinne ved å ropa at han skulle stikka ho med ei sprøyte med amfetamin.

Innbrot og forsøk på svindel

Mannen var òg tiltalt for innbrot. I april 2014 knuste han eit vindauge i ein bustad og stal blant anna ein TV, softgun-utstyr, ein forsterkar og ein bærbar pc.

I mai same år prøvde han, med ein annan sitt visakort, å få med seg ein iphone og ei datamaskin frå Lefdal i Laguneparken.

Oppbevaring av narkotika

I juni 2013 oppbevarte tiltalte 65 narkotiske tablettar (40 rivotril og 25 sobril) i ein bustad i Os. I mai 2014 blei han tatt med 3,38 gram amfetamin i Bergen, i juni 2015 blei han tatt med cirka 3 gram amfetamin i bustaden sin i Os.

I april 2015, i ein bustad i Bergen, oppvearte han 32,5 gram amfetamin.

Må sona fire månadar

Tiltalte møtte i retten og sa seg skyldig.

Han blei dømt til seks månadar fengsel. Fullbyrding av 60 dagar blei utsett med prøvetid på to år.

Tre dagar med varetekt kom til frådrag.