Dobbel salsrekord i Os!
Denne veka blei ein bustad i Os selt til rekordpris. Så blei ein annan eigedom selt til same pris.
Bildeserie:
Den dyraste i Os? skreiv Midtsiden då ein einesbustad i januar 2014 blei selt for 6.675.000 kroner. Det har vore selt dyrare leilegheiter i Os, men neppe einebustadar, ifølgje meklar.
Men denne gongen blei rekorden knust - to gongar.
Kvar av eigedomane blei selt for 7,2 millionar kroner, begge blei selt av Privatmegleren.
Bygd i 1825
Den eine eigedomen som blei selt til rekordpris var på Brimsholmen i Øyane.
– Det er eit hus bygd i 1825 med grei, men eldre standard.
– Det følgjer eit kjekt naust og eit fint gjestehus på 80 kvadratmeter bygd i 2013 med eigedomen, fortel Arild Vikøyr frå Privatmegleren Bjørnefjorden.
Eigedomen, som har vore brukt som fritidsbustad dei siste åra, blei selt før det blei lagt ut på marknaden.
– Det var fleire som viste interesse, men seljar valte å gå for dette bodet, fortel han.
– Stor interesse frå Bergen
Den andre rekordeigedomen ligg på Nesjaryggen i Lysefjorden og er ein einebustad på 274 kvadratmeter med fem soverom.
– Det var mange på vising og stor interesse for dette huset, spesielt frå Bergen, fortel Roar Nylund frå Privatmegleren Syd.
Det gjorde at det blei ein rask og god salsprosess.
– Eg meiner dette er rett pris for denne eigedomen. Det er eit flott hus på ei fantastisk tomt. Hadde den lagt på motsett side av Fanafjellet ville prisen blitt langt høgare.