Digital mobbing blir ofte også fysisk

Bildeserie:

Full skjerm

1 av 1

I tenesteutvalet onsdag fortalde fagsjef Per Olav Sørås at kommunen no vil trappa opp att innsatsen mot mobbing i skulane i Os.

– Godt og trygt læringsmiljø er eitt av satsingsområda våre, men når vi har vore rundt på ansvarsdialog med skuleleiarane, så ser vi at det har kome litt i bakgrunn av fokuset på læring og tidleg innsats. Det grip vi no fatt i.

Lærer av Finland

Sørås, som òg er vegleiar i Læringsmiljøprosjektet i regi av Læringsmiljøsenteret ved Universitetet i Stavanger, fortel at forskning viser at mobbing handlar om eit maktspill. Ofte er det ein som leier ann og eit par som heng seg på.

– Det handlar om ein proaktiv aggressivitet, kor mobbaren ønskjer å oppnå noko. Det kan til dømes vera eit ønskje om å bli sett av vaksne.

– Skal ein forebyggja mobbing må vi aktivisere tilskodarane, dei som ser mobbinga. Vi kjem til å kursa elevane, slik vi såg dei gjer i Finland, som er veldig gode på dette, under ein studietur. Der har dei 20 timars kurs med elevane på kva kan du gjera for å hindre mobbing, kva gjer du for å seie i frå, forklarte Sørås medan han viste verktøyet mobberingen (sjå bilete over).

Bør brukast i fredstid

Verktøyet meiner Sørås er fornuftig å bruka i fredstid, for å kunne takast fram att om det oppstår ein mobbesituasjon.

– Mobberingen er lurt å bruka i fredstid. La elevane ha ein god diskusjon på kor dei ville ha plassert seg sjølv i ringen. Seier til dømes 12 stykker at dei vil forsvara mobbeofferet, så kan ein laga ein allianse. Til no har det vore for lite fokus på dei som står rundt, meiner Sørås.

Opprettar beredskapsteam

Ei endring i opplæringslova §9A seier at skulene ikkje lengre skal gjera enkeltvedtak i mobbesaker, men at skulen har fått tydlegare aktivitetsplikt og at det er lovfesta nulltoleranse mot krenkingar.

– I Os vil vi laga eit system frå hausten av som sikrar at kommunenivået kjem tidleg nok inn i vanskelege sakar. Vi vil oppretta eit tverrfagleg beredskapsteam som aller helst skal fungera som rådføringsteam, men som også kan gå inn i alvorlege sakar.

– Vil det fungera som eit slags mobbeombod, undra Sandra Austgulen (Ap).

– Ja, det blir omtrent det. Eg ser for meg kommunepsykolog, helsesøster, PTT og ein dedikert leiar frå ein skule. Eg veit kven eg vil spørja. Så er eg frekk nok til at eg ser for meg at eg sjølv skal leia teamet.

Eit nederlag om nokon må bytte skule

Politikarane var godt nøgd med arbeidet ein no tek fatt på og at ein igjen aukar fokuset.

– Men i fastlåste mobbesituasjoner, har kommunen ei rutine på om det er mobbaren eller offeret som må bytte skule, eller tas det får sak til sak, undra Henriette Lien (Ap).

– Personleg meiner eg at ingen bør bytta skule. Det er eit nederlag. Dei som mobber er ikkje onde menneskje, men treng vaksne som er tydelege. Eg ønskjer at ein klarer å løyse det. Tradisjonelt sett er det ofte sånn at offeret er den som flyttar, men vi ser at ofte går ryktet foran og det blir ny mobbing. Ønskje er at ingen må flytta. Det er eit nederlag for oss som skule og kommune.

Blir ofte fysisk i tillegg

Tore Kleppe (Frp) peika på at stadig meir mobbing går føre seg i sosiale medier og digitalt.

– Ja, og vi har fokus på det. Den digitale mobbinga er nok meir infam. Men det er i all hovudsak slik at om du mobbar digitalt, så driv du nok også fysisk mobbing. I allefall om mobbaren og offeret kjenner kvarandre, forklarte Sørås.