Diesel aukar meir enn elbil

I går kom Statistisk Sentralbyrå (SSB) med tal på køyretøy i Noreg ved utgangen av 2015, inkludert statistikk for fylke og kommune.

Det siste året (2014-2015) har talet på registrerte elbilar i Os nærmast dobla seg, frå 260 til 444 bilar, ei auke på 184 bilar.

På same tid har det kome 289 fleire bilar som går på diesel, mens bensindrivne bilar har det blitt 36 færre av på eitt år.

Samla sett er det registrert 9773 personbilar i Os, ei auke på 437 frå 2014. Elbil utgjer 4,54 prosent av desse, mot 2,78 prosent året før.

Dieseldobling på fem år

Ser vi fem år tilbake har talet på elbil auka frå 6 (!) i 2010 til 13, 41 og 129 i 2011, 2012 og 2013.

På same tid har talet på dieselbilar auka frå 2642 til 4492, mens bilar som går på bensin har gått ned frå 5395 til 4837.

Fleire motorsyklar og traktorar

Frå 2010 til 2015 har talet på køyretøy i Os auka med 2935, frå 15.711 til 18.646.

Talet på personbilar har auka med over 1700, talet på tunge motorsyklar har auka med nesten 100.

Her er utviklinga for nokre av køyretøygruppene (2010-2015):
Personbilar: Frå 8085 til 9833
Bussar: Frå 41 til 19
Varebilar: Frå 1015 til 1323
Traktorar: Frå 419 til 454
Mopedar: Frå 454 til 482
Lett motorsykkel: Frå 70 til 67
Tung motorsykkel: Frå 443 til 536
Tilhengarar: Frå 2735 til 3585

Os meir elektrisk enn landssnittet

På landsbasis var det registrert 1,24 millionar personbilar med dieseldrift ved utgangen av 2015. Dette er 4,8 prosent fleire enn 2014, og dieselbilane utgjorde 47,6 prosent av den totale personbilbestanden.

Talet på bensindrivne personbilar blei redusert med 2,5 prosent i den same periode til 1,30 millioner, og utgjorde 49,7 prosent.

Talet på elektrisk drivne personbilar auka med heile 79 prosent frå same periode året før, frå 38 600 til 69 100. Målt som del av bestanden utgjorde elbilane 2,6 prosent mot 1,5 prosent året før. Os har, som nemnt over, auka frå 2,8 til 4,5 prosent når det kjem til elbil.