– Dette var himmelsk
Etter seks rundar utan poeng tok Lysekloster i dag full pott på bortebane.
Lysekloster tok i dag sine første poeng i 2. divisjon, borte mot tabelltoar Florø, som med dette gjekk på sesongens første tap.
– Etter tap i seks kampar på rad, 0-9 heime i førre runda, var vi på botnen. Vi tok ein lang prat etter den kampen, seier trenar Thomas Sandal.
Essensen i praten seier han ikkje noko om, anna enn at det var opplagt at noko måtte endrast.
– Vi har ikkje endra formasjon eller anna, men i dag speler vi sånn vi skal. Etter ei god treningsveke, trass i at vi framleis har ein del skadar i troppen, klarte vi i dag å visa at vi kan.
Lysekloster låg kompakt og kom på overgangar. Begge lag hadde ifølgje Sandal kvar sin sjanse dei ikkje skåra på i førsteomgang. Etter 1-2 byrja Florø å slå langt, men utan å få utteling.
– Vi var bunnsolid i forsvar og spelte disiplinert. Dette var ein lagsiger!
– Korleis var det å sjå spelarane gå av banen etter endeleg å ha vunne igjen?
– Det var himmelsk! Det har faktisk blitt uvant å vinna, men no er det berre smil i heile bussen her, seier Lysekloster-manageren på veg heim.
Florø - Lysekloster 1-3 (1-1)
Målskårarar, Lysekloster: Hans-Christian Nysæther (1.), Sindre Flaa (66.) og Ståle Steen Sæthre (90.)
(Det står feil i kamprapporten og Midtsiden meldte først at Baste Jonassen og Sigve Rørstad, som hadde assist på 1-2, sto for dei første skåringane).
0-1 kom etter noko klabb og babb i feltet etter corner. Nysæther sette ballen i nota i første speleminutt. Utlikninga kom på corner.
Lysekloster fekk frispark på ein overgang i 2. omgang. Rørstad sitt frispark blei sett i mål av Flaa. På overtid auka Sæthre til 1-3.
Lysekloster: Ole Kristian Olsen, Gojko Ivkovic, Ola Sjømæling, Baste Jonassen, Denis Ljubovic, Hans-Christian Nysæther, Martin Røttingen Eidsvik (Steffen Finsådal 90.), Sindre Hitland Flaa, Sigve Rørstad, Ståle Steen Sæthre og Thomas Helland (Ken-Joar Føyen 81.)
70 år og ny stadion
– No gler vi oss til å feira idrettslaget sin 70-årsdag under heimekamp med offisiell opning av ny stadion, seier Sandal.
Framo Lysekloster Idrettspark har fått tak over tribunen og utvida klubbhus.
Lysekloster tar imot Fyllingsdalen, som har tatt 9 poeng på 7 kampar, laurdag om ei veke (kl 14).