Dette klarte ikkje trønderane

Bildeserie:

Full skjerm

1 av 1

I januar 2012 blei det kjent at dåverande eigar, Rieber & Søn (no Orkla Foods), ville flytta produksjonen av Vestlandslefsa frå fabrikken på Bø til Lierne i Trøndelag. Ein av bakgrunnane for flyttinga var at fabrikken på Bø trengde vesentlege oppgraderingar, samstundes som fabrikken i Lierne gjekk med ledig kapasitet.

Den gong fortalde hovudtillitsvald for Toro Os, Stian Kyte, at det hadde vore prøveproduksjon i Lierne og at dei sleit med å gjenskapa den genuine Vestlandslefsa.

Les òg: Vestlandslefsa blir flytta

Mykje gjekk gale

Trønderane forsikra om at dei skulle klara å laga like gode lefser som vestlendingane.

– Vi kan laga minst like god Vestlandslefse som vestlendingane, meinte Lierne-gründar John Helge Inderdal då.

Inderdal hadde då selt fabrikken til Rieber & Søn, men heldt fram som implementeringssjef i fabrikken.

No fortel Inderdal kva som gjekk gale, då dei skulle implementera produksjonen i Trøndelag.

Til Namdalavisa fortel Indredal om kva som skjedde i samband med at produksjonen blei flytta frå Os til Lierne. Manglande engasjement og vilje til å driva vidare i gründerånd hjå leiinga og store utskiftingar gjorde at fabrikken sleit.

– Eg ba om frie tøyler. Det var gjort mykje gale som måtte rettast opp igjen, fortel Inderdal, som fekk avslag på tilbodet.

I staden henta eigarane inn nye folk, og delar av produksjonsutstyret frå Os.

Les òg: Her blir lefsefabrikken tømt

Flyttar på nytt

Etter fleire år med dårlege økonomiske resultat avgjorde styret i Orkla Foods tysdag at fabrikken i Lierne lir same skjebne som fabrikken på Os gjorde. Den blir lagt ned.

Til dagens styremøte hadde styret tre val.

• Oppgradering av verksemda i Lierne.
• Flytting av produksjonen.
• Sal av fabrikken til ei investorgruppe med tidlegare gründer Indredal i spissen.

Styret falt ned på løysinga om å flytta produksjonen frå Lierne til fabrikken på Stranda, kor dei mellomanna produserar pizza.

– Det viser vel berre at dei ikkje tok ei god avgjer då dei bestemte seg for å legga oss ned.

– Vi får berre ønskje dei lykke til på Stranda, kommenterar Kyte.

– Her kompetansen sit

På spørsmål om det kunne vore ein tanke å jobba for å flytta Vestlandslefsa heim til Os er Kyte klar.

– Det er her ekspertisen til å få det til ligg.

– Den kompetansen familien Bøe og Fagerthun Mekaniske sit på, er den som gjorde Vestlandslefsa til den suksessen den blei.

– Men det vil nok krevja mykje kapital å få det til, avsluttar Kyte.