– Dette har vi gledd oss til!

Framleis står det kassar og esker over alt. Midt i det kontrollerte kaoset står administrativ leiar Siri Linn Schmidt Fotland og kommuneoverlege for legevakta Sveinung Gangstø og smilar.

- Dette har vi gledd oss kjempemykje til!

- Kjem de i mål til klokka 16?

- Jada, vi er i rute, no gjenstår det berre å jobba på spreng dei to timene fram til klokka fire så kan pasientane koma, seier Schmidt Fotland.

Vore med på prosessen

Spesielt kjekt tykkjer ho det har vore å få følgje heile prosessen så tett som dei har gjort.

- Eg trur alle sjukepleiarane har vore oppom her undervegs og fått sett lokala ta form.

- Det har vore ein fantastisk prosess å få vera med på.

Ring på førehand

Samstundes oppmodar ho folk om å ringe legevakta før dei kjem på døra.

- Det kan vera at legen er ute i anna oppdrag. Ringer ein på førehand så slepp ein gjerne å sitta på venterommet å venta, forklarar den administrative leiaren.

Sjølv om legevakta har flytta er telefonnummeret det samen. Du når dei på 815 17 020.

Større plass

Den største skilnaden på lokala i det nye beredskapshuset på Moberg og dei gamle lokala i Kolskogen er plassen.

- Her slepp pasientane å gå forbi den som sit og tek imot telefonane. Dermed blir det enklare å ivareta teieplikta.

- I tillegg er det meir plass generelt. Berre det å få eit eige lager er fantastisk, strålar Schmidt Fotland.

Styrka bemanning

Til å betjena legevakta er dei ein lege og ein eller to sjukepleiarar på vakt samstundes.

- To sjukepleiarar er det på dei mest travel tidene.

- Det fekk vi til då Fusa og Austevoll kom inn på telefontenesta vår, då trengde vi å utvida kapasiteten med ein ekstra sjukepleiar, forklarar Sveinung Gangstø.

Trivdes i næringsparken

I ei periode har legevakta halde hus i mellombelse lokalar hjå Os allmennpraksis i næringsparken.

- Det har fungert veldig bra.

- Vi blei utruleg godt motteke. Dei som jobbar der til dagen har vore heilt fantastiske, avsluttar Siri Linn Schmidt Fotland med eit smil.