Dette frådraget gløymer mange

Måndag 30. april er fristen for å levere skattemeldinga. Det er du sjølv som er ansvarleg for at opplysningane stemmer.

Mange gløymer reisefrådraget

Så langt har 86 prosent av lønnstakarane i Sogn og Fjordane, Hordaland og Rogaland opna skattemeldinga si, men framleis er det omlag 108.000 som ikkje har sjekka opplysningane sine.

− Viss ikkje du sjekkar skattemeldinga di, kan du gå glipp av frådrag som skulle vore med. Til dømes er reisefrådrag noko vi ser mange gløymer, og her er det pengar å spare, seier avdelingsdirektør i Skatteetaten, Trude Husevåg i ei pressemelding.

Berre eit foreløpig svar

Sjølv om skattemeldinga er førehandsutfylt med dei opplysningane skatteetaten har om økonomien din, så veit dei ikkje alt om deg.

– Skattemeldinga gir berre eit foreløpig svar på om du skal ha pengar igjen eller om du får restskatt.

− På skatteetaten.no finn du all relevant informasjon om skattemeldinga. Du kan mellom anna sjå korleis du sjekkar skattemeldinga di steg for steg, få oversikt over alle postane, og bruke frådragsvegvisaren og pendlarvegvisaren. Det kan vere ei god investering å ta turen innom nettsidene våre no i innspurten, seier Husevåg som legg til at om du har spørsmål så kan skatteetaten kontaktast på chat, Facebook (Skatten min) eller på telefon 800 80 000.

– VI har utvida opningstider i desse kanalane fram til leveringsfristen.

Inga endring - inga levering

Viss du er lønnstakar eller pensjonist, har sjekka at opplysningane i skattemeldinga er korrekte og ikkje har endringar, treng du ikkje levere. Har du endringar og må levere skattemeldinga, kan du enkelt levere den elektronisk.

Når kjem skatteoppgjeret?

Du får det endelege skatteoppgjeret når dei har behandla skattemeldinga di. Skatteoppgjeret for 2017 er tidlegast klart 27. juni. Skatteetaten kan ikkje opplyse deg om den eksakte datoen for ditt skatteoppgjer, men dei varslar deg på sms/e-post når oppgjeret ditt er klart.