– Dette er ikkje ein parkeringsplass
Politiet med melding til rektor etter skulestart.
Måndag morgon var politiet ute med patrulje i samband med skulestart for grunnskulen.
– Patruljen var ved Os barneskule. Der gjekk det fint for seg, men dei fann éin ting å reagera på, fortel politioverbetjent Anne Lyssand.
Av- og påstigningsfeltet ved gymsalen til Os barneskule blei konsekvent brukt til parkering.
– Rektor fekk tilbakemelding om dette.
Også politibåten har vore på tokt i helga.
– Fredag kveld køyrde dei i skjergarden rundt Søre Øyane. Dei fann ikkje noko å reagera på.
På land har det kome inn ulike meldingar.
I 2020.tida laurdag fekk dei melding om ein bil som hadde køyrd med veldig stor fart gjennom Skogafjellstunnelen.
– Meldar var redd. Ho hadde barn i bilen, og sa ho var nær på å bli påkøyrd bakfrå av vedkomande, som køyrde ein BMW personbil.
Søndag i 17-tida fekk politiet melding om ein påkøyrd katt.
– Katten blei påkøyrd i Auredalen og blei liggande i grøfta. Meldar hadde ungar og hundar i bilen, og hadde ikkje utstyr til å ta katten med seg. Men han hadde vore på døra til dei som bur nærmast staden, ingen av dei kjente katten.
Brannvesenet har hatt to utrykningar i helga.
– Laurdag klokka 17.55 fekk dei melding om ein utløyst alarm i Lekven-området, klokka 02.19 natt til måndag kom det melding om utløyst alarm i Landboden.
– Dei rykte ut til Landboden, men det var verken lukt eller andre teikn på brann i området, opplyser Lyssand.
