– Dette er eit bevis på at eg kan nå måla mine

Bildeserie:

Full skjerm

1 av 2

Vita-butikken på AMFI Os held fram med å gjera seg bemerka.

For to år sidan vart Anita Lyssand kåra til årets butikksjef - i år vart Anja Håvardstun Iversen årets medarbeidar i regionen.

Dedikasjon og kundeservice

Iversen fortel at ho tykkjer det er stas å no ha tittel «Årets medarbeidar 2018»;

– Eg har vore nominert før, men å faktisk bli årets medarbeidar, er noko eg ser på som ei stor ære.

På spørsmål om kva som ligg bak ein slik tittel, fortel Iversen at det ligg fleire parameter til grunn;

– Gode salstal, engasjement, produktkunnskap og kundeservice ligg alle i vurderinga.

I tillegg vert Club Vita-andelen rekna inn i vurderinga, fortel Iversen.

Under prisutdelinga på kjedens bankett tidlegare i vinter, fekk butikken òg pris for vera årets butikk når det gjeld Club Vita medlemmer. Med ein medlemsandel på 83 prosent blant 217 butikkar i Noreg, er det ingen som kan visa like høge tal som Os-butikken.

– Frå mi side ligg det ein god dose dedikasjon i arbeidet eg gjer. På toppen av det ligg det mi personlege interesse for skjønnhet og velvære. Med dette som drivkraft har eg no fått ein bevis på at eg kan nå dei måla eg set meg.

Bryr oss om kundane

Saman med butikksjef Anita Lyssaand, har Iversen med seg Celine Lyssand og Shirley Fredriksen på laget i butikken.

Iversen trur årsaka til suksessen butikken opplev skuldast fleire ting.

– Eg trur vi gjer det bra fordi vi bryr oss om kundane våre. Vi tek oss tid til å avdekka kva for behov kvar enkelt kunde har, og ikkje minst likar vi å snakka med kundane våre. Som team her i butikken fungerer vi utruleg godt, og vi er flinke til å oppdatera kvarandre- og kundane på kva som er nytt og spanande.

Stolt sjef

Butikkdrivar Anita Lyssand legg ikkje skjul på kva ho tykkjer om dei tre jentene ho har i arbeid;

– Å driva fagbutikk innan skjønnheit og velvære er ein tøff bransje.

– Vi har heilt klart konkurranse frå internett, men eg er velsigna med tilsette som er veldig fokuserte, dyktige og ikkje minst intereserte i faget vi driv med. Seinast no har jentene byrja med demo-videoar på Instagram, kor dei kjem med gode råd og tips til kundane våre.

Les òg: Drog på varemesse - kom heim med trofé